रक्सौल नाकाबाट ४ सय नेपालीलाई स्वदेश फर्काइयो

काठमाडौं, जेठ १४ । पर्साको रक्सौल नाका हुँदै भारतबाट आज बिहान चार सय जना नेपाली स्वदेश भित्रिएका छन् । वीरगञ्जको सीमावर्ती भारतीय शहर रक्सौलमा ६५ दिनदेखि क्वारेन्टिनमा बसेकाहरु सहितलाई स्वदेश फर्काइएको हो । नेपाल फर्केका सबैको स्वास्थ्य परीक्षण गरेर सबन्धित स्थानीय तहमा पठाउने जिल्ला प्रशासन कार्यालय पर्साले जानकारी दिएको छ ।

रक्सौलमा रहेका करिब छ सय नेपालीलाई स्वदेश फर्काउन लागिएको प्रशासनले जानकारी दिएको छ । लामो समयदेखि भारतको क्वारेन्टिनमा बसेकाहरुले स्वदेश फर्कन पाउदा खुशी ब्यक्त गरेका छन् ।

विभिन्न ३२ जिल्लाका नागरिकहरु भारतका विभिन्न सहरबाट रक्सोल आएर रोकिएका थिए । भारतबाट आएकालाई सम्बन्धित जिल्लाका क्वारेन्टिनमा चौध दिन राखी पीसीआर परीक्षणपछि मात्रै घर फर्काइने बताइएको छ । यसअघि भारतका बिभिन्न राज्यका करिब पाँच सय भारतीय नागरिकलाई मंगलवार रक्सौल पठाइएको थियो ।