सिटीको न्युकासल युनाइटेडमाथि ३–१ को जित दर्ता
म्यानचेस्टर (एजेन्सी) । गए राति प्रिमियर लिगमा म्यानचेस्टर सिटीले न्युकासल युनाइटेडमाथि ३–१ को जित दर्ता गरेको छ । सो जितमा सिटीका मुख्य स्ट्राइकर सर्जियो अगुएरोले ह्याट्रिक गरे ।
खेलको ३४ औं मिनेटमा अगुएरोले गोल गर्दै टोलीलाई अग्रता दिलाए । त्यस्तै खेलको ६३ औं मिनेटमा अगुएरोले पेनाल्टी मार्फत टोलीको अग्रता दोब्बर पारे । ६७ औं मिनेटमा जेकोब मर्फिले न्युकासलका लागि गोल फर्काए पनि ८३ औं मिनेटमा अगुएरोले फेरि गोल गर्दै आफ्नो ह्याट्रिक पुरा गरे ।
यस जितसँगै सिटीले दोस्रोमा रहेको म्यानचेस्टर युनाइटेडसँग १२ अंकको अन्तरलाई कायम राखेको छ । त्यस्तै हिजो साँझको खेलमा चेल्सीले ब्राइटनलाई ४–० ले हराउन सफल रह्यो । चेल्सीका लागि एडेन हाजार्डले दुई गोल गरे भने विलियन र भिक्टर मोसेसले एकएक गोल थपेका थिए ।
एन्थोनी मार्सियालको निर्णायक गोलमा युनाइटेडले बर्नलीमाथि १–० को जित दर्ता गर्यो भने अर्को बलियो टोली आर्सनलले क्रिस्टल प्यालेसमाथि ४–१ को शानदार जित हासिल गर्यो ।
आर्सनलका लागि नाचो मोनरियाल, लोरेन्ट कोसियल्नी, एलेक्स इवोबि र एकेल्जान्डर लाकाजेटले पहिलो हाफमै ४ गोल गरेका थिए । प्यालेसका लागि लुका मिलिभोयेभिचले दोस्रो हाफमा एक सान्तवना गोल गरेका थिए ।
प्रतिक्रिया दिनुहोस्