सेमिफाईनल प्रबेशका लागी बाराकोट र खलंगा भिड्दै

काठमाडौं । बैतडीमा जारी प्रथम मेयरकप क्रिकेट प्रतियोगिता २०७४ अन्तर्गत आज पनि समूह चरणका दुई खेल सम्पन्न हुने भएका छन् । बुड्डा बाजे क्रिकेट मैदान रातामाटामा सम्पन्न हुने पहिलो खेलमा बिहान ९ बजे दशरथचन्द नगरपालिका १० बाराकोट र वडा नम्बर ४ खलंगा भिड्नेछन ।

बाराकोट र खलंगामध्ये विजयी टोली सेमिफाईनल प्रबेश गर्ने नगर क्रिकेट समितिका अध्यक्ष अशोक बहादुर चन्दले जानकारी दिनुभयो । यस्तै मध्यान्ह १२ बजेपछी हुने दोस्रो खेलमा दशरथचन्द नगरपालिकाको वडा नम्बर ७ दुर्गास्थान र वडा नम्वर ५ दशरथचन्दबिच प्रतिस्प्रर्धा हुने भएको छ ।

शहीद दिवसको अवसरमा दशरथचन्द नगरपालिकाको आयोजना र बैतडी जिल्ला क्रिकेट संघ , नगर क्रिकेट समितिको प्राविधिक सहयोगमा प्रतियोगिता सञ्चालन भईरहेको हो । टि ट्वान्टी फरम्याटमा भईरहेको प्रतियोगितामा प्रथम पुरस्कार ५० हजार, द्वितीय पुरस्कार ३० हजार र म्यान अफ द सिरीज १ जनालाई ५ हजार नगद, ट्रफी र प्रमाणपत्र राखिएको छ ।

माघ १० गतेसम्म सञ्चालन हुने प्रतियोगितामा दशरथचन्द नगरपालिकाका ११ टिमको सहभागिता रहेको छ । माघ ३ गतेदेखि सुरु भएको मेयरकप क्रिकेट प्रतियोगिताले बैतडीमा क्रिकेटको विकास हुनुका साथै नगरभित्र रहेका क्रिकेटका नयाँ प्रतिभाको खोजी गर्न सहयोग मिल्ने विश्वास गरिएको छ ।