राष्ट्रिय वाणिज्य बैंकले ल्यायो भक्तपुर दरबार स्क्वायरमा एटीएम सेवा संचालनमा

काठमाडौं, माघ २२ । राष्ट्रिय वाणिज्य बैंकले भक्तपुर दरबार स्क्वायरमा एटीएम सेवा संचालनमा ल्याएको छ । भक्तपुर दरबार स्क्वायर क्षेत्रमा महानगरिय प्रहरी परिसर तथा जिल्ला प्रशासन कार्यालयको प्राङ्गणमा ए.टी.एम.सेवा संचालनमा ल्याएको बैंकले जनाएको छ ।

उक्त ए.टी.एम.सेवाको भक्तपुर नगरपालिकाका मेयर सुनिल प्रजापतिले बुधबार एक समारोहका बीच उद्घाटन गरेका छन् । नेपालको सांस्कृतिक तथा पुरातात्विक महत्वको विश्व सम्पदा सूचिमा रहेको भक्तपुर दरबार स्क्वायर क्षेत्रमा सरकारी बैंकको सेवाले यस क्षेत्रको महत्व बढेको र अन्य सम्भावित क्षेत्रमा पनि बैंकिङ्ग सेवा दिनुपर्ने उनले बताए ।

कार्यक्रममा बैंकका प्रमुख कार्यकारी अधिकृत किरणकुमार श्रेष्ठले बैंकले संभावित क्षेत्रमा बैंकिङ्ग सेवा दिने बताउदैं उक्त ए.टी.एम.बाट चौबीसै घण्टा सेवा उपलब्ध हुने बताए । एटीएम सेवा संचालनमा आएसँगै अब ग्राहकहरुलाई सजिलो हुने भएको छ ।