ए डिभिजन लिगमा संकटाको चौथो जित

काठमाडौं, माघ १९ । सहिद स्मारक ए डिभिजन लिग फुटबलमा संकटा क्लबले जित हात पारेको छ।

आइतबार दशरथ रंगशालामा भएको खेलमा संकटाले हिमालयन शेर्पा क्लबलाई १–० गोलको जित निकालेको हो। संकटाको जितमा अजय मार्टिन्स कायोडले गोल गरे। उनकै एक मात्र गोलमा संकटाले संघर्षपूर्ण जित निकालेको हो।

खेलको २१औं मिनेटमा मार्टिन्सले गोल गर्दै संकटालाई अग्रता दिलाएका थिए। पहिलो हाफमा १–० गोलको अग्रता बनाएको संकटाले दोस्रो हाफमा पनि यहि नतिजालाई कायमै राख्दै जित हात पारेको हो।

यो जितसँगै संकटा लिगको छैटौं स्थानमा उक्लिएको छ। संकटाले १० खेलबाट ४ खेलमा जित, ३ खेलमा बराबरी र ३ खेलमा हारसहित १५ अंक बनाएको छ। पराजित हिमालयन शेर्पा भने १० खेलबाट ७ अंक बनाएर लिगको १२औं स्थानमा छ।