ऐतिहासिक उपाधि विजेता महिला भलिबल टोलीले ३-३ लाख पाउने

काठमाण्डौ , कात्तिक २९ । नेपाललाई ऐतिहासिक उपाधि दिलाउने भलिबल टोलीका सदस्यलाई ३-३ लाख रुपैयाँ पुरस्कार दिइने भएको छ ।

खेलाडीलाई स्वागत गर्दै सदस्य सचिव सिलवालले पुरस्कार स्वरुप तीन–तीन लाख रुपैयाँ दिने घोषणा गरका हुन् ।

बंगलादेशको ढाकामा भएको एभीसी सेन्ट्रल जोन महिला भलिबल च्याम्पियनसिपको उपाधि जितेको नेपाली टिम शुक्रबार स्वदेश फर्किएको छ ।

प्रतियोगिताको कुनै पनि खेलमा पराजय नभोगी च्याम्पियन बन्न सफल नेपाली टिमलाई राष्ट्रिय खेलकुद परिषद्का सदस्य सचिव रमेश कुमार सिलवालले त्रिभूवन अन्तर्रा्ष्ट्रिय विमानथलमा स्वागत गरेका थिए ।

२० वर्षे भलिबल इतिहासमा नेपाली महिला टोलीले प्राप्त गरेको यो पहिलो स्वर्ण पदक हो ।

प्रतियोगितामा नेपाली प्रतिभा माली सर्वोत्कृष्ट खेलाडी घोषित भएकी थिइन् । प्रतियोगिताकै उत्कृष्ट स्पाइकरको उपाधि पनि प्रतिभाले नै जितेकी थिइन् । यस्तै सलिना श्रेष्ठ उत्कृष्ट लिब्रो घोषित भए ।

खेलाडीलाई स्वागत गर्नका लागि पूर्व खेलकुद मन्त्री दलजित श्रीपाइली, राष्ट्रिय खेलकुद परिषद्का उपाध्यक्ष पिताम्बर तिम्सिना, नेपाल भलिबल संघका पदाधिकारी तथा खेलप्रेमीहरु विमानस्थलमा पुगेका थिए । उनीहरुलाई विमानस्थलमा भव्य स्वागत गरिएको थियो ।