एएफसी यू–१९ छनोटमा नेपालले आज इरानसँग प्रतिस्पर्धा गर्दै, जित्नैपर्ने दबाबमा नेपाल

काठमाडौं, कात्तिक २२ । इरानमा जारी एएफसी यू–१९ छनोट प्रतियोगिता अन्तर्गत दोस्रो खेलमा नेपालले आज घरेलु टोलीसँग खेल्न लागेको छ ।

एएफसी यू–१९ छनोट प्रतियोगितामा शुक्रबार नेपालले इरानसँग प्रतिस्पर्धा गर्दैछ । तेहरानमा हुने खेल नेपाली समय अनुसार राति आठ बजे हुनेछ ।

पहिलो खेलमा यूएईसँग ४–० को भारी अन्तरले पराजित भएको नेपाललाइ छनोट हुने सम्भावना कायम राख्नका लागि बाँकी दुई खेल जित्नै पर्नेछ ।

इरानले भने पहिलो खेलमा किर्गिज गणतन्त्रलाई ३–० ले हराएको थियो । छनोट प्रतियोगिताको सबै समूहमा चार–चार टिम छन् र समूहको शीर्ष टोलीले समूह चरणमा स्थान बनाउनेछन् । दोस्रो स्थानका उत्कृष्ट पाँच टिम पनि समूह चरणमा पुग्नेछन् ।