अफगानिस्तानले बंगलादेशलाई २५ रनले हरायो

बंगलादेश टी–२० ट्राइ सिरिजमा अफगानिस्तानले बंगलादेशलाई हराएको छ । अफगानिस्तानले घरेलु टिम बंगलादेशलाई २५ रनले हराएको हो । टस जितेर ब्याटिङ रोजेको अफगानिस्तानले २० ओभरमा ६ विकेट गुमाउँदै १६४ रन बनाएको थियो ।

अफगानिस्तानका लागि मोहम्मद नाबीले उत्कृष्ट प्रदर्शन गरे । उनले ५४ बलमा ८४ रनको योगदान दिए । उनले सात छक्का र तीन चौका प्रहार गरेका थिए । यस्तै अस्गर अफगानले ४० रन बनाए । अन्य खेलाडीले धेरै रन दिन सकेनन् ।
बलिङतर्फ मोहम्मद सैफुद्धिन एक्लैले चार विकेट लिए भने शकिब अल हसनले दुई विकेट लिए ।

१६५ रनको लक्ष्य पछ्याएको बंगलादेश १९.५ ओभरमा १३९ रनमा अलआउट भयो । बंगलादेशका लागि महमुदुल्लाहले सर्वाधिक ४४ रनको योगदान दिए भने अन्य खेलाडिले धेरै रन जोड्न सकेनन् ।