फिलिपिन्समा डुंगा दुर्घटना : २५ जनाको मृत्यु, ६ जना बेपत्ता

काठमाडौं, साउन १९ । फिलिपिन्समा डुंगा दुर्घटना हुँदा २५ जनाको मृत्यु भएको छ भने ६ जना बेपत्ता भएका छन् ।

फिलिपिन्सको मध्य क्षेत्रमा पर्ने दुईवटा प्रान्तका सामुद्रिक तटनजिकै भएको डुंगा दुर्घटनामा परी २५ जनाको मृत्यु भएको हो भने ६ जना बेपत्ता भएका हुन् ।

इलोइलो र गुईमारासमा शनिबार तीनवटा डुंगा दुर्घटना हुँदा उनीहरुको मृत्यु भएको अधिकारीहरुले आइतबार जानकारी दिएका छन् ।

प्रकोप व्यवस्थापन निकायका अधिकारीहरुका अनुसार हराइरहेका थप ६ जनाको खोजी जारी रहेको ति अधिकारीहरुले जनाएका छन् ।

इलोइलोबाट गुईमारासतर्फ गइरहेका बेला आँधी आएपछि तीन घण्टाको अवधिमा तीनवटा डुंगा पल्टिएको जनाइएको छ । आँधीले समुद्रमा ठूलो छाल ल्याएको थियो ।

आँधी, छाल र बर्षाका कारण यस क्षेत्रको मौसम खराब भएको छ भने यात्रुहरुले पनि दुःख पाउँदै आएका छन् ।