फर्किएको पहिलो खेलमा नै कोस्टाको गोल

म्याड्रिड (एजेन्सी) । चेल्सीबाट एथ्लेटिको म्याड्रिडमा पुनः फर्किएका स्पेनिस स्ट्राइकर डिएगो कोस्टाले पहिलो खेलमै गोल गरेका छन् । चेल्सीले समर विन्डोमा उनलाई बेचे पनि जनवरीको ट्रान्सफर बजार नखुल्दा सम्म उनले स्पेनिस क्लबसँग खेल्न नपाउने थिए ।

एथेलेटिकोबाट पहिलो खेलमा मैदान प्रवेश गरेको ५ मिनेटमा उनले गोल गरेका हुन् । कोपा डेल रेमा लेइडा एस्पोर्ट्युविरुद्दको खेलमा बेञ्चबाट सुरुआत गरेका कोस्टा ६५ औं मिनेटमा मैदान प्रवेश गरेका थिए । उनले ६९ औं मिनेटमा गोल गर्दै एथ्लेटिकोलाई ३–० को अग्रता दिलाएका थिए । स्पेनको तेस्रो डिभिजनको क्लबसँग उक्त खेल एथ्लेटिकोले ४–० ले जित्यो । यो अन्तिम १६ को पहिलो लेगको खेल थियो ।

एथ्लेटिकोका लागि डिएगो गोडिनले ३३ औं मिनेटमा अग्रता दिलाएका थिए भने ३७ औं मिनेटमा लिभरपुल तथा चेल्सीका पूर्व स्ट्राइकर फर्नान्डो टोरेसले दोस्रो गोल दिलाएका थिए । कोस्टाको गोल पछि इन्जुरी समयमा एन्टोनियो ग्रिजमानले चौथो गोल गरेका थिए ।