मलेसियामाथि नेपालको लगातार दोस्रो जित

काठमाडौँ , असार २९ । मलेसियासँगको दुई ट्वेन्टी–ट्वेन्टी क्रिकेट शृङ्खला नेपालले २–० ले जितेको छ । आइतबार भएको दोस्रो खेलमा नेपाल ६ रनले विजयी भएको हो । १७४ रनको लक्ष्य पछ्याएको घरेलु टोली मलेसियाले ७ विकेटको क्षतिमा १६७ रन बनायो ।

उसका लागि सिएद अजिजले ३७ बलमा ५०, अमिनुद्दिन राम्लीले ११ बलमा २४ तथा वीरनदीप सिंहले २३ बलमा २३ रन बनाए । नेपालका सोमपाल कामी र सन्दीप लामिछानेले दुई–दुई विकेट लिए ।

आइसिसी वर्ल्ड ट्वेन्टी–ट्वेन्टी क्वालिफायर एसिया फाइनल्सको तयारीमा रहेको नेपाली टोलीले पहिले ब्याटिङ्ग गर्दै १७३ रन बनाएको थियो । नेपालका लागि विनोद भण्डारीले नटआउट ५१ रन बनाए । उनले २५ बलमा तीन चौका र पाँच छक्काको सहयोगमा अर्धशतक बनाएका हुन् ।

यस्तै शरदभेषवाकरले २८ बलमा ४० रन बनाए । नेपालका कप्तान पारस खड्काले १९ बलमा २३ रन बनाए । शनिबार भएको पहिलो खेलमा उनले नटआउट ८६ रनको योगदान दिएका थिए । पारसको शानदार प्रदर्शनमा पहिलो खेलमा पनि नेपाल विजयी भएको थियो ।

मलेसियामा अभ्यास गरेर नेपाली टोली त्यतैबाट सिंगापुर जानेछ । आइसिसी वर्ल्ड ट्वेन्टी–ट्वेन्टी क्वालिफायर एसिया फाइनल्स जुलाई २० देखि २९ सम्म सिंगापुरमा हुँदैछ ।