विश्वकप क्रिकेट : बंगलादेशलाई पराजित गर्दै भारत सेमिफाइनलमा
काठमाडौं, असार १८ । भारत जारी विश्वकप क्रिकेट प्रतियोगिताको सेमिफाइनल प्रवेश गरेको छ । बंगलादेशलाई पराजित गर्दै भारत सेमिफाइनलमा पुगेको हो । लिग चरणको आफ्नो अन्तिम खेल अघि नै भारत सेमिफाइनलमा पुग्न सफल भएको हो ।
मंगलबार राति सम्पन्न खेलमा बंगलादेशलाई २८ रनले पराजित गर्दै भारतले सेमिफाइनलमा आफ्नो स्थान सुरक्षित गरेको हो । प्रतियोगिताको सेमिफाइनलमा पुग्ने भारत दोस्रो टोली हो । यसअघि अस्ट्रेलिया सेमिफाइनलमा पुगिसकेको छ ।
बर्मिङ्घममा भएको खेलमा टस जितेर पहिले ब्याटिङ गरेको भारतले नौ विकेटको क्षतिमा ३१४ रन बनाएको थियो ।
३१५ रनको लक्ष्य पाएको बंगलादेश २८६ रनमै सीमित भयो । भारतसँग पराजित भएसँगै बंगलादेश भने सेमिफाइनलको रेसबाट बाहिरिएको छ ।
भारतका लागि जसप्रित बुमराह सर्वा्धिक सफल बलर रहे । उनले १० ओभरमा ५५ रन दिएर चार विकेट लिए ।
प्रतियोगितामा चौथो शतक प्रहार गरेका रोहित शर्मा प्लेयर अफ दि म्याच भए । उनले १०४ रन बनाएका थिए ।
प्रतिक्रिया दिनुहोस्