विश्वकप क्रिकेट : श्रीलंकाको सेमिफाइनल सम्भावना टुट्यो, दक्षिण अफ्रिका ९ विकेटले विजय

काठमाडौं ,असार १४ । इङ्ल्याण्डमा जारी आईसीसी एकदिवसीय विश्वकप क्रिकेटमा दक्षिण अफ्रिका विजय भएको छ । दक्षिण अफ्रिकाले श्रीलंकालाई ९ विकेटले हराएसंगै विजय हुन पुगेको हो ।

यसअघि नै समूह चरणबाट बाहिरिने पक्का भइसकेको दक्षिण अफ्रिकाले गएराति भएको खेलमा श्रीलंकालाई ९ विकेटले हरायो ।

श्रीलंकाले दिएको २ सय ४ रनको सामान्य लक्ष्य दक्षिण अफ्रिकाले ३७ ओभर २ बलमा १ विकेट गुमाएर पुरा र्गयो ।

उसका लागि कप्तान फाफ डु प्लेसिस र हसिम अमलाले १ सय ७५ रनको साझेदारी गरे । प्लेसिसले अविजित ९६ रन बनाउँदा अमलाले ८० रन जोडे ।

यसअघि टस हारेर पहिले ब्याटिङ गरेको श्रीलंकाले ४९ ओभर ३ बलमा अलआउट हुँदै २ सय ३ रन बनाएको थियो ।

श्रीलंकालाई सस्तैमा समेट्न दक्षिण अफ्रिकाका क्रिस मोरिस र ड्वेन प्रिटोरियोसले ३र३ विकेट लिए ।

जितसँगै दक्षिण अफ्रिकाले ८ खेलबाट ५ अंक जोडेको छ ।

श्रीलंकाको भने ७ खेलबाट ६ अंक छ । यो हारसँगै श्रीलंकाको शीर्ष चारमा रहँदै विश्वकपको सेमिफाइनल पुग्ने सम्भावना सकिएको छ ।

विश्वकप क्रिकेटमा आज दुई खेल हुनेछन् । आज पाकिस्तानले अफगानिस्तानसँग खेल्दा अस्ट्रेलिया र न्यूजिल्याण्ड भिड्दैछन् ।