विश्वकप क्रिकेटः वेष्ट इन्डिजमाथि भारतको शानदार जित
काठमाडौं, असार १३ । विश्वकप क्रिकेटमा वेष्ट इन्डिजमाथि भारतले शानदार जित निकालेको छ ।
वेष्ट इन्डिजलाई पराजित गर्दै विराट कोहली कप्तानीको भारत जारी एक दिवसीय विश्वकप क्रिकेटको सेमिफाइनल नजिक पुगेको छ ।
बिहीबारको खेलमा भारतले वेष्ट इन्डिजलाई १२५ रनले पराजित गरेको हो । २६९ रनको लक्ष्य पछ्याएको वेष्ट इन्डिजले ३४ ओभर दुई बलमा सबै विकेट गुमाएर मात्रै १४३ रन बनाउन सक्यो ।
भारतका मोहम्मद शमीले चार विकेट लिए । यस्तै जसप्रीत बुमराह र युजवेन्द्र चहलले दुई–दुई विकेट लिए । वेष्ट इन्डिजका सुनिल अम्ब्सिले ३१ रन बनाए । क्रिस गेलल मात्रै ६ रन बनाएर आउट भए ।
यसअघि पहिलो ब्याटिङ्ग गरेको भारतले कप्तान विराट कोहली र महेन्द्र सिंह धोनीको अर्धशतकको सहयोगमा सात विकेटको क्षतिमा २६८ रन बनायो । विराटले ७२ तथा धोनीले ५६ रन बनाए । यस्तै केएल राहुलले ४८ तथा हार्दिक पाण्डेयले ४६ रनको योगदान दिए ।
६ खेलमा पाँचौँ जित निकालेको भारतको ११ अंक भएको छ र उ दोस्रो स्थानमा छ । उसले अन्तिम चारमा स्थान बनाउने सम्भावना बलियो बनेको छ । प्रतियोगितामा आज श्रीलंकाले दक्षिण अफ्रिकासँग खेल्नेछ ।
प्रतिक्रिया दिनुहोस्