विनाशको सामानाका लागि तयार रहन इरानलाई ट्रम्पको चेतावनी
काठमाडौं, असार ७ । द्वन्द्व भड्किए विनाशका लाति तयार रहन अमेरिकी राष्ट्रपति डोनाल्ड ट्रम्पले इरानलाई चेतावनी दिएका छन् ।
उनले आफूले युद्ध नचाहे पनि द्वन्द्व भड्किए विनाशको सामनाका लागि तयार रहन इरानलाई चेतावनी दिएका हुन् ।
अमेरिकाको ‘एनबीसी’ टेलिभिजनसित कुरा गर्दै उनले अमेरिका वार्ताका लागि खुला रहेको तर इरानलाई आणविक हतियार विकास गर्न नदिने बताए ।
अमेरिकी सेना इरानविरूद्धको आक्रमणका लागि तयारी अवस्थामा पुगे पनि आक्रमण गर्नु १० मिनेटअघिमात्रै मनसाय बदलेको ट्रम्पले बताए ।
उनले बिहीबार खसालिएको अमेरिकी जासुसी ‘ड्रोन’को जवाफमा इरानका विभिन्न तीनओटा ठाउँमा आक्रमणको योजना बनाएपनि १५० जना मानिस मारिने थाहा भएपछि आक्रमण रोक्ने निर्णय गरेको बताए ।
इरानले उक्त ड्रोन आफ्नो आकाशमा आएकाले खसालेको बताएपनि अमेरिकाले ड्रोन अन्तर्रा्ष्ट्रिय आकाशमै रहेका बेला खसालिएको दाबी गरेको छ ।
यता, अमेरिकाले आफ्नो देशमा दर्ता भएका सबै विमानलाई खाडी र आसपासका समुद्रमाथिका इराननियन्त्रित हवाईमार्ग प्रयोग गर्न प्रतिबन्ध लगाएको छ ।
अमेरिका र तेहरानबीच बढेको तनावको असर अन्तर्रा्ष्ट्रिय बजारमा पनि देखिएको छ । पछिल्लो समय सामानमा पनि बृद्धि भएको छ ।
प्रतिक्रिया दिनुहोस्