रियल मड्रिड आएका हजार्ड भन्छन्, म सुपरस्टार होइन तर कोशिस गर्नेछु

काठमाडौ, ३१ जेठ । स्पेनिस क्लब रियल मड्रिड आएका हजार्ड भन्छन्, म सुपरस्टार होइन तर कोशिस चाँही गर्नेछु । स्पेनिस क्लब रियल मड्रिडले बेल्जियमका स्टार खेलाडी इडेन हजार्डलाई आफ्नो क्लबमा भव्य स्वागत गरेको छ ।

चेल्सीबाट रियल आएका हजार्डले पाँच वर्षका लागि सम्झौता गरेका थिए । गत साता नै हजार्ड रियल आउने टुंगो लागे पनि उनी मेडिकल टेष्टमा थिए । १५० मिलियन पाउण्ड खर्चर गरेर ल्याएका हजार्डलाई आफ्नो घरेलु मैदानमा करिब ५० हजार दर्शकको अघि रियलले भव्य स्वागत गरेको हो । मैदानमा हजार्डले जर्सी लगाएर प्रवेश गरेका थिए । त्यस्तै, मैदानमै उनको जर्सी सार्वजनिक गरिएको थियो ।

क्लबमा अनुबन्धन भएसँगै हजार्डले रियलबाट खेल्ने आफ्नो सपना रहेको बताएका छन् । उनले भनेका छन्, ‘मेरो बच्चैदेखिको सपना थियो कि म रियल मड्रिडबाट फुटबल खेलुँ । म सुपरस्टार त होइन तर कोशिस गर्नेछु ।’
बेल्जियमका स्टार खेलाडी इडेन हजार्ड भर्खर २८ बर्ष पुगेको र यो मेरो लागि राम्रो अवसर रहेको बताउछन् ।