बारामा ग्यास सिलिण्डर पड्किँदा सात जना घाइते, दुई अवस्था गम्भीर

काठमाडौं, जेठ २४ । बारामा ग्यास सिलिण्डर पड्किँदा सात जना घाइते भएका छन् ।

बाराको डुमरवानामा खाना पकाउने ग्यास सिलिण्डर पड्किँदा एकै परिवारका दुईसहित सात जना घाइते भएका हुन् । घाइतेमध्ये दुईको अवस्था गम्भीर रहेको छ ।

घटनामा ६७ वर्षीय नजरमान थिङसहित उनकी बुहारी ३२ वर्षीया ज्ञानीमाया थिङ, ३२ वर्षीय बौद्धमान थिङ, ३२ वर्षीय अनिता थिङ रहेका छन् । त्यसैगरी ४८ वर्षीया दिलमाया वाइबा, ५५ वर्षीया साईमाया वाइबा, ३२ वर्षीया दिलमाया वाइबा पनि सिलिण्डर पड्किएर घाइते भएका छन् ।

घाइतेहरुको सिमरास्थित अल्पाइन अस्पतालमा उपचार भइरहेको प्रहरीले जनाएको छ । प्रहरीका अनुसार रेगुलेटर जोड्ने क्रममा ग्यास लिक भएर ग्यास पड्किएको हो ।

जीतपुरसिमरा उपमहानगरपालिका–१४ स्थित स्याउली बजारमा नरजमान थिङको घरमा सिडिन्डर पड्किएको प्रहरीले जनाएको छ ।