भारतमा लोकसभा चुनाव सकियो, मतगणनाको थालनी बिहीबारबाट सुरु

भारतमा सातै चरणको लोकसभा चुनाव सकिएको छ । मतगणनाको थालनी बिहीबारबाट सुरु गरिने भएको छ । निर्वाचन आयोगले जनाएअनुसार आइतबार भारतमा सम्पन्न सातौं चरणको लोकसभा चुनावमा ६१.१३ प्रतिशतले मतदान गरेका छन् ।

आइतबार चन्डीगढ र सात राज्यका ५९ सीटका लागि मतदान भएका थिए । एक महिनाभन्दा बढी समय अवधि लगाएर सम्पन्न चुनावमा करिब ९० करोड भारतीय मतदाता मतदानका लागि योग्य रहेका थिए ।

चुनावका लागि दश लाख मतदान केन्द्र तोकिएको थियो । मत परिणाम मे २३ पछि सार्वजनिक गर्ने तालिका निर्वाचन आयोगको रहेको छ ।

यस चुनावमा मोदीको दल भारतीय जनता पार्टीले नेतृत्व गरेको नेशनल डेमोक्रेटिक एलाएन्स (एनडिए) र राहुल गान्धीको दल भारतीय राष्ट्रिय कंग्रेस नेतृत्वको युनाइटेड प्रोग्रेसीभ एलाएन्स (युपीए)बीच मुख्य प्रतिस्पर्धा हुने देखिएको विभिन्न सर्वेक्षणले देखाएका छन् ।