दक्षिण एसियाली रोल बल सुरु

काठमाडौं । नेपाल रोल बल संघको आयोजनामा तेश्रो दक्षिण एसियाली रोल बल च्याम्पियनसिप शुक्रबारदेखि त्रिपुरेश्वरस्थित राष्ट्रिय खेलकुद परिषद्को कभर्डहलमा सुरु भएको छ ।
पहिलो दिन नेपाल दुवै खेलमा पराजित भयो । पुरुषमा भारतले नेपाललाई ६–४ ले पराजित ग¥यो । भारतका हिमान्शु लाम्बा र आकाश सिंहले २–२ तथा आकाश गणेश वारे र जय सेडाकरले १–१ गोल गरे । नेपालबाट आशय विसीले २ तथा मनोज वज्राचार्य र सजिव महर्जनले १–१ गोल गरे ।
महिलामा पनि भारतले नेपाललाई १२–० को फराकिलो गोलअन्तरले हरायो । जितमा इशाशंकरले ५, नतिसा सन्धुले ४, श्रृष्टि शर्माले २ र पूजा महलाले १ गोल योगदान गरे ।
प्रतियोगिताको पूर्व प्रधानमन्त्री माधवकुमार नेपालले एक कार्यक्रमबीच उद्घाटन गरे । सो अवसरमा राष्ट्रिय खेलकुद परिषद्का सदस्य–सचिव केशवकुमार विष्टलगायतको उपस्थिति रहेको थियो । प्रतियोगितामा नेपाल, भारत, बंगलादेश र श्रीलंका गरी ४ राष्ट्रको सहभागिता रहेको आयोजक संघका अध्यक्ष वीरकृष्ण महर्जनले जनाएका छन् । प्रतियोगिता शनिबार सम्पन्न हुनेछ ।