भारतको हरियाणमा सेल्फी लिनेक्रममा रेलले किचेर ३ किशोरको मृत्यु

काठमाडौं, बैशाख १८ । भारतको हरियाण राज्यको पानिपतमा सेल्फी लिने क्रममा रेलले किचेर ३ किशोरको मृत्यु भएको छ ।

भारतको हरियाणा राज्यको पानीपतमा रेलमार्गमा उभिएर सेल्फी लिँदै गरेका उनीहरुलाई रेलले कुल्चिएको हो ।

प्रहरीका अनुसार एक युवकको भने ज्यान जोगिएको छ । प्रत्यक्षदर्शी एम एस डबासले चारै जना किशोर रेलमार्गमा उभिएर मोबाइलबाट सेल्फी लिँदै गरेका थिए । त्यहीबेला नै रेलले उनीहरुमध्ये तीन जनालाई कुल्चिएको जानकारी दिए ।

ती युवा एउटा वैवाहिक कार्यक्रममा सहभागी हुन पानीपत आइपुगेका थिए । मृत्यु भएकामध्ये दुई जना १९ वर्षका र एक जना १८ वर्षका थिए ।

पछिल्लो समय रेलमार्गमा सेल्फी लिनेक्रममा धेरैको ज्यान जाने गरेको अनुसन्धानहरुले देखाएका छन् ।

गतवर्ष अखिल भारतीय आयुर्विज्ञान संस्थानले गरेको एक अध्ययनमा सन् २०११ देखि २०१७ को बीचमा सेल्फी लिनेक्रममा विश्वभर करिब २५९ जनाको ज्यान गएको उल्लेख छ । तर सेल्फी लिनेक्रममा सबैभन्दा बढीको मृत्यु भारतमा हुने गरेको छ ।