अमेरिकामा टोर्नाडो, ८ जनाको ज्यान गयो , थुप्रै घाइते

काठमाडौं, वैशाख ३ । अमेरिकामा टोर्नाडोमा परि ८ जनाको मृत्यु भएको छ । अमेरिकाको टेक्सस राज्यमा आएको टोर्नाडोमा परि ८ जनाको मृत्यु हुनुका साथै थुप्रै घाइते पनि भएका छन् ।

गुडिरहेको कारमाथि रुख ढल्दा पछाडिको सिटमा रहेका दुई बालबालिकाको मृत्यु भएको छ । कारको अघिल्लो सीटमा रहेका उनीहरुका बाबुआमा भने सुरक्षित छन् । आँधीबाट टेक्सस, मिसिसिपी र लुजियाना राज्य बढी प्रभावित भएका छन् ।

अमेरिकाका मौसमविद्हरुले हिजोमात्रै ओहायो, दक्षिण क्यारोलिना र भर्जिनियाका जनतालाई टोर्नाडो आउन सक्ने भन्दै सचेत रहन अपिल गरेका थिए । आँधीका कारण अमेरिकाका अधिकांश शहरहरुमा क्षति पुगेको छ । ५५ वटा घर भत्केका छन् भने हवाई तथा यातायात सेवा अवरुद्ध हुँदा सयौं यात्रुहरु अलपत्र परेका छन् ।

उद्धारका लागि सयौं उद्धारकर्मीहरु परिचालन गरिएको छ ।