एभरेष्ट प्रिमियर लिगः को को खेल्दैछन् सोमबार

काठमाडौं । एभरेष्ट प्रिमियर लिग ईपीएल क्रिकेट प्रतियोगिताअन्तर्गत सोमबार दुई खेल हुँदैछन् । काठमाडौं किंग्स इलाभेनले विराटनगर वारियर्ससँग र पोखरा राइनोजले भैरहवा ग्लाडिएटर्ससँग प्रतिस्पर्धा गर्दैछन् ।

पहिलो खेलमा पारस खड्काको कप्तानीमा रहेको विराटनगरले श्रीलंकाली खेलाडी परवेज महारुफको कप्तानीमा रहेको काठमाडौंसँग खेल्न लागेको हो । टीयू क्रिकेट मैदानमा हुने खेलमा काठमाडौंलाई जित्नैपर्ने दबाब छ । यता, विराटनगर भने अन्तिम चारमा पुगिसकेको छ ।

त्यस्तै, सोमबार नै हुने दोस्रो खेलमा शक्ति गौचनको कप्तानीमा रहेको पोखरा र शरद भेषवाकरको कप्तानीमा रहेको भैरहवा आमनेसामने हुन लागका छन् । अन्तिम ४ मा पुग्ने सम्भावनालाई बलियो बनाउनका लागि पनि दुवै टिमलाई जित्नैपर्ने दबाब छ । ४ खेलमा शतप्रतिशत जित हात पारेको विराटनगर ८ अंक बनाउँदै ईपीएलको शीर्ष स्थानमा छ ।

३ खेलमा दुईमा जित र एकमा हार बेहोर्दै ४ अंक बनाएको पोखरा दोस्रो स्थानमा रहँदा समान ३ खेलबाट २ खेलमा जित र एक खेलमा हार बेहोर्दै ४ अंक नै बनाएको भैरहवा तेस्रो स्थानमा छ । भैरहवा पोखराभन्दा नेट रनरेटको आधारमा पछि परेको हो ।