पिएसजीले रियललाई अवश्य हराउने छः किलियन बाप्पे

पेरिस (एजेन्सी) पेरिस सेन्ट जर्मेन (पिएसजी) का युवा फरवार्ड किलियन बाप्पेले च्याम्पियन्स लिगमा रियल म्याड्रिडलाई हराउनेमा बिश्वस्त रहेको बताएका छन् ।

मोनाकोबाट पिएसजीमा लोनमा रहेका १८ वर्षे फ्रान्सेली फरवार्डले फ्रान्सेली टेलिभिजनसँगको अन्तवार्तामा च्याम्पियन्स लिगको अन्तिम १६ को भेट रियलसँग हुन लागेकोले त्यसमा आफ्नो कुनै गुनासो नरहेको समेत बताएका छन् । बाप्पेले भने, ‘च्याम्पियन्स लिग जित्ने लक्ष्य लिएको टोलीले सबै बलियो टोलीलाई हराउने क्षमता राख्नु पर्दछ , रियल बलियो टोली मध्ये एक हो । त्यसैले रियलसँग खेल्नु पर्ने हुँदा मैले सामान्य रुपमा लिएको छुु । ‘

उनले रियलमाथि जित दर्ता गराउने विश्वास व्यक्त गरे । उनले थपे, ‘हामी रियललाई अवश्य पनि हराउने छौं । यो लक्ष्य सहज छैन तर फेब्रुअरीसम्म पूर्ण रुपले तयारीमा जुट्ने छौं ।’ च्याम्पियन्स लिगको अन्तिम १६ को पहिलो लेगमा फेब्रुअरी १५ मा पिएसजीले रियलको घरेलु मैदानमा खेल्नेछ ।