नेयमार रियल म्याड्रिड गए म दुःखी हुने छुः इनिएस्टा

बार्सिलोना (एजेन्सी) । बार्सिलोनाका मिडफिल्डर आन्द्रेस इनिएस्टाले नेयमार रियल म्याड्रिड जाने हल्लाप्रति दुःख व्यक्त गरेका छन् । इनिएस्टाले नेयमार प्रतिद्वन्दि रियल म्याड्रिड गए उनीसँग रिसाउने र दुःखी हुने बताए ।

नेयमार यसै वर्ष २ सय २२ मिलियन यूरोमा बार्सिलोनाबाट पिएसजी गएका हुन् । तर अहिले उनको पिएसजीबाट फेरी रियल म्याड्रिड जाने हल्लाले निकै चर्चा पाएको छ । आधिकारिक रुपमा नभए पनि रियलका अध्यक्ष फ्लोरेन्टिनो पेरेजले नेयमारका बुवासँग कुरा गरिरहेको पनि जनाइएको छ ।

इनिएस्टाले भने “फुटबलमा जे पनि हुन सक्छ । हामीले नहुन सक्ने घटना पनि भएको देखेका छौं । नेयमार रियल गए म दुखी हुने छु किनभने रियल हाम्रो प्रत्यक्ष प्रतिद्वन्दि हो र नेयमारले उसलाई पक्कै बलियो बनाउने छ ।”

इनिएस्टाले क्रिस्टियानो रोनाल्डोले बलोन डि’ओर जिते पनि लियनल मेस्सी नै रोनाल्डोभन्दा राम्रा खेलाडि रहेको पनि इङ्लिस पत्रिका मिररसँगको संवादमा जनाए ।