बिग ब्यास लिगः सन्दीपको टिमले आज पहिलो खेल खेल्दै

काठमाडौ, पौष ६ । बिग ब्यास लिग क्रिकेटमा लेग स्पिनर सन्दीप लामिछानेको टिम मेलबर्न स्टार्सले आज सिड्नी थन्डर विरुद्ध पहिलो खेल खेल्दैछ ।

खेल नेपाली समय अनुसार दिउँसो २ बजे सुरु हुनेछ । आफ्नो टिमको पहिलो खेलमा नै सन्दीपले डेब्यु गर्ने सम्भावना निकै रहेको छ । मेलबर्नको विदेशी खेलाडीमा वेष्ट इन्डिजका ड्यान ब्राभोसँगै नेपालका सन्दीप लामिछाने मात्रै रहेका छन् ।

दुई जना विदेशी खेलाडीले एक खेलमा खेल्न पाउने नियम भएको हुदा सन्दीपको सम्भावना प्रवल मानिएको हो ।

बिग ब्यासमा सन्दीपले डेब्यु गर्न पाए उनको सपना पूरा हुनेछ । उनले आफ्नो सपना बिग ब्यास खेल्ने रहेको बताउँदै आएका छन् । मेलबर्नका कप्तानीमा ग्लेन म्याक्श्वेल रहेका छन् ।