उत्कृष्ट खेलाडीलाई राष्ट्रिय तथा अन्तर्राष्ट्रिय खेलाडी संघले सम्मान गर्ने

काठमाडौ , मंसिर १४ । राष्ट्रिय खेलकुद परिषद् राखेप च्याम्पियनसिपमा समावेश २९ खेलका उत्कृष्ट ३२ खेलाडीलाई राष्ट्रिय तथा अन्तर्राष्ट्रिय खेलाडी संघले आगामी पुष १३ गते सम्मान गर्ने भएको छ ।
बिहीबार संघले ललितपुरमा पत्रकार सम्मेलन गर्दै खेलाडीलाई सम्मान गर्ने जानकारी दिएको हो । २९ खेलका उत्कृष्ट खेलाडीबाट एक जना महिला र पुरुष खेलाडीलाई सर्वोत्कृष्ट वर्ष खेलाडी पुरस्कारबाट सम्मान गर्ने संघका अध्यक्ष दिपक श्रेष्ठले जानकारी दिनुभयो । सम्मानित हुने खेलाडीलाई जनही १० हजार रुपैयाँ प्रदान गरिने छ ।

त्यस्तै अन्तर्राष्ट्रिय धावक गजराज जोशीको नाममा रहेको आर्दश खेलाडी सम्मानबाट १ जना खेलाडीलाई सम्मान गरिनेछ । आदर्श खेलाडीबाट सम्मानित हुनेले २५ हजार रुपैयाँ पाउनेछन् । संघले एनएनआईपीए पत्रकारिता पुरस्कारबाट १ जना खेल पत्रकारलाई पनि सम्मान गर्ने जनाएको छ । ललितपुरको पाटन दरबार स्क्वायरमा हुने कार्यक्रमको वडा नम्बर १६ का स्थानीय आयोजकको रुपमा रहनेछ ।