काठमाडौं, २७ कात्तिक। अमेरिकाको क्यालिफोर्नियाको जंगलमा फैलिएको डढेलोका कारण गुमाउनेको संख्या ४४ पुगेको छ। क्यालिफोर्नियाको उत्तरी क्षेत्रमा क्याम्प फायरबाट फैलिएको आगलागीका कारण ज्यान गुमाउनेको संख्या ४२ पुगेसँगै कुल मृतकको संख्या ४४ पुगेको हो ।
अहिलेको आगलागी क्यालिफोर्नियाको इतिहासमै सबैभन्दा घातक बनेको छ । यसअघि सन् १९३३ मा लस एन्जलसको ग्रिफिथ पार्कमा भएको आगलागीमा ३१ जनाको ज्यान गएको थियो ।
क्यालिफोर्नियाका तीन ठाउँबाट फैलिएको डढेलोका कारण जनजीवन प्रभावित भएको छ । क्यालिफोर्नियाको दक्षिणी क्षेत्रमा वुल्फी फायरका कारण नोक्सानी भइरहेको छ । मालिबुमा धेरै क्षति भएको छ ।
अहिलेसम्म दुई लाख ५० हजार भन्दा बढी मानिसहरु बिस्थापित भएका छन् । तीव्र गतिमा चलेको हावाका कारण आगो फैलिरहेको छ र निभाउने प्रयास सफल हुन सकेको छैन । यस्तै हिल फायरका कारण पनि जनजीवन प्रभावित बनेको छ ।
प्रतिक्रिया दिनुहोस्