काठमाडौँ, २१ कात्तिक । वरिष्ठ अधिवक्ता कुसुम श्रेष्ठको ८३ वर्षको उमेरमा आज निधन भएको छ ।
श्वासप्रश्वाससम्बन्धी समस्या भएपछि थापाथलीस्थित नर्भिक इन्टरनेशनल अस्पतालमा उपचारका लागि भर्ना भएका श्रेष्ठको आज बिहान ५ः३५ बजे निधन भएको नेपाल कानून समाजका कार्यकारी निर्देशक कृष्णमान प्रधानले जानकारी दिए ।
तनहँ बन्दीपुरमा जन्मीएका श्रेष्ठले भारतको कोलकत्ताबाट कानूनी शिक्षा हासिल गरेका थिए । सर्वाेच्च अदालत बारको पहिलो अध्यक्षसमेरहेका श्रेष्ठ नेपाल बार एशोसिएशन र नेपाल कानून समाजको पनि अध्यक्ष भएका थिए ।
कानूनसम्बन्धी धेरै कृति र लेख प्रकाशन गर्नुभएका श्रेष्ठले पञ्चायत कालमा प्रजातन्त्रको पक्षमा उभिनुभएका बिपी कोइरालालगायत नेताको पक्षमा कानूनी बहस पैरवी गरेका थिए । नेपालको कानूनी शिक्षा, संवैधानिक विकासका अतिरिक्त अनुशासित र मर्या्दित कानून व्यवसायीका रुपमा उनले महत्वपूर्ण भूमिका निर्वाह गरेको प्रशासकीय अदालतका अध्यक्ष काशीराज दाहालले बताए ।
स्व श्रेष्ठका श्रीमती, तीन छोरा र एक छोरी छन् । उनको पाथिव शरीर भोलि श्रद्धाञ्जलिका लागि दिउँसो १ देखि ४ बजेसम्म नेपाल बारमा राखिने छ भने साँझ पशुपति आर्यघाटमा दाहसंस्कार गरिने पारिवारिक स्रोतले जनाएको छ ।
प्रतिक्रिया दिनुहोस्