इन्डोनेसिया भूकम्पबाट मृत्यु हुनेको संख्या १४ पुग्यो , फसेका २ सयभन्दा बढी पदयात्री उद्धारको पर्खाइमा

काठमाडौं । इन्डोनेसियाको लोम्बोक प्रायःद्वीपमा आइतबार बिहान गएको शक्तिशाली भूकम्पका कारण चर्चित ट्रेकिङ रुट माउन्ट रिन्जनीमा २ सयभन्दा बढी पदयात्री फसेका छन्। आइतबार बिहान गएको ६ दशमलब ४ म्याग्निच्युटको भूकम्पबाट मृत्यु हुनेको संख्या १४ पुगेको अधिकारीहरुले जनाएका छन्। भूकम्पमा परी १ सय ६० भन्दा बढी घाइते भएका छन्।

माउन्ट रिन्जनीमा फसेका पदयात्रीको उद्धारको काम भइरहेको छ। ट्रेकिङमा गएका एक मलेसियन र एक इन्डोनेसियन नागरिकको ढुंगाले लागेर मृत्यु भएको बताइएको छ। ट्रेकिङमै रहँदा भूकम्पमा परेर फर्किन नसकेका फ्रान्स, थाइल्यान्ड, नेदरल्यान्ड्स र मलेसियाका नागरिक उद्धारको पर्खाइमा रहेको बताइएको छ।

इन्डोनेसियाली अधिकारीहरुका अनुसार ५ सयभन्दा पदयात्री ट्रेकिङ रुटबाट बाहिर निस्किसकेका छन्। हेलिकोप्टरले पहाडी क्षेत्रमा फसेका २ सय ६६ जनाको खोजी गरिरहेको जनाइएको छ।

ट्रेकिङ गाइड सुकन्ताका अनुसार ट्रेकिङ रुटको मध्यभाग तिर रहेको ताल नजिक धेरै पदयात्री फसेका छन्। उनले भनेका छन्, ुपहिरोका कारण बाहिर निस्कन सक्ने अवस्था छैन।