मकवानपुरको भीमफेदी दुर्घटनामा मृत्यु भएका १० जना मध्ये अधिकांश एउटै टोलका

काठमाडौं, २६ कार्तिक । काठमाडौंबाट सर्लाही जाँदै गरेको माइक्रोबस मकवानपुरको भीमफेदीमा बिहीबार बिहान भएको दुर्घटनामा मृत्यु भएका १० जना मध्ये अधिकांश एउटै टोलका रहेका छन् । मृतकहरूको सनखत नभए पनि उनीहरू सर्लाहीको चक्रघट्टा गाउँपालिका ४ सुन्दरपुर टोलका उनीहरू रहेको चक्रघट्टा गाउँपालिका अध्यक्ष कृष्ण यादवले बताए ।

पालिका अध्यक्ष यादवका अनुसार एउटै टोलका करिब पाँच परिवारका सदस्यहरू सवार गाडी दुर्घटनामा परेको हो । १५ जना सवार गाडी सडकबाट करिब ७०० मिटर तल खसेर दुर्घटना हुँदा १० जनाको मृत्यु भएको प्रहरीले जनाएको छ । मृत्यु हुनेमा ५ पुरुष, ३ महिला र २ बालिका रहेका छन् । मकवानपुर प्रहरीका अनुसार दुर्घटनामा ६ जना घाइते भएका छन् । घाइते हुनेमा ३ पुरुष र ३ बालक छन् ।

पालिका अध्यक्ष यादवका अनुसार मृतकमध्ये बढी सुन्दरपुर टोलका छन् । काठमाडौंमा फलफूल व्यवसाय गरिरहेका उनीहरू छठ मनाउन एउटै गाडी रिजर्भ गरेर घर फर्किरहेको बेला दुर्घटनामा परेका हो ।

‘घर फर्किनेहरू प्रायः काठमाडौंमै बसेर व्यापार व्यवसाय गरिरहेका थिए । छठ मनाउन एउटै गाडी रिजर्भ गरेर आइरहेको बेला दुर्घटनमा परेको हो । अहिलेसम्म पाँच परिवारको मान्छेहरू छन् भन्ने मैले जानकारी पाएको छु’ उनले भने ‘म र गाउँका साथीहरू जाँदै छौं । बाटोमा छौं।’

गाडी धनी अवधेश चौधरीका अनुसार चालकसँग राति १ बजेपछि सम्पर्क नभए बताए। उनले घटनाबारे माइक्रो व्यवसायी संघबाट थाहा पाएको सुनाए।