देवीघाटमा ६० मिटर लामो ‘एक्रो ब्रिज’ निर्माण सुरु

काठमाडौं, २१ भदौ । नुवाकोटको देवीघाटमा ६० मिटर लामो ‘एक्रो ब्रिज’ निर्माण सुरु गरिको छ।

भदौ १० गते आएको भोटेकोसी बाढीले तादी नदीको पक्की पुल बगाएपछि यहाँ नेपाली सेनाले फलामे ‘एक्रो ब्रिज’ निर्माण अघि बढाएको हो।

विदुर नगरपालिका(५ देवीघाटस्थित तादी नदीमा इन्जिनियर र नेपाली सेनाका फौजसहित ५५ जनाको टोली ‘एक्रो बृज’ निर्माणमा खटिएका छन्।

अबको केही दिनमै पुल निर्माण सकिने र यहाँ पैदल आवतजावत तथा यातायात संचालन सहज हुने पुल निर्माणको नेतृत्व गरिरहेका सेनानी चिरिञ्जीवी चौलागाईंले जानकारी दिए।

भोटेकोशी नदीको बाढीको बहाव तादीमा पसेर उक्त स्थानका दुई पक्की पुलमा क्षति पुगेसँगै नुवाकोटको बेलकोटगढी हुँदै धादिङसँग टुटेको यातायात सम्पर्क टुटेको छ।

नेपाली सेनाको श्री १४ नम्बर वाहिनी अड्डाअन्तर्गत रहेको ‘ब्रिजिङ युनिट’ मार्फत निर्माण भइरहेको पुल पाँच दिनभित्र सञ्चालनमा ल्याउने लक्ष्य छ।

नुवाकोटको पाँच स्थानमा पुल राख्न अध्ययन भएको सेनाले जनाएको छ। देवीघाटमा पुल जडानलगत्तै वेत्रावतीमा एक्रोब्रिज पुल जडान गरेर नुवाकोट र रसुवासँगको यातायात सम्पर्क सञ्चालन गरिने योजना छ।

‘पुल निर्माणका लागि पुरानै जिप प्रयोग गर्न सक्ने अवस्था र धादिङको गल्छी हुँदै नुवाकोटको देवीघाटबाट सदरमुकाम विदुरसँग आउजाउ सञ्चालन गराउन पहिलो प्राथमिकतामा देवीघाटमा पुल निर्माण थालिएको छ,’ उनले भने, ‘शनिबारदेखि निर्माण सुरु भएको पुल पाँच दिनभित्र सम्पन्न गर्ने लक्ष्यसहित ५५ जनाको टोली चौबिसै घण्टा कार्यक्षेत्रमा खटिएको छ।’

नेपाली सेनासँग धादिङको गजुरीस्थित भैरव गणमा तीन थान मौजुदा राखिएको पुल नुवाकोट र रसुवाको बाढी प्रभावित क्षेत्रमा आउजाउ सञ्चालन गराउन प्रयोग गरिने सेनाले जनाएको छ । सेनासँग ७५ मिटर दूरीका तीन थान पुल मौजुदा राखिएको थियो।

देवीघाटमा निर्माण थालिएको पुल ५७।५ मिटर लम्बाइ र ५।५ मि चौडाइको छ। बेलीब्रिजभन्दा एक्रोब्रिज गुणस्तरीय र धेरै भारवहन क्षमताको रहने सेनानी चौलागाईंले जानकारी दिए। उनका अनुसार अहिले निर्माण थालिएको पुलले ७० टन भारवहन क्षमता छ।

‘बेलीब्रिजको प्रविधिलाई परिमार्जन गरेर बनाइएको आधुनिक अमेरिकी रूप भएकाले एक्रोब्रिज थप तीन गुणा बढी बलियो र टिकाउ हुनेछ,’ उनले भने, ‘उच्च गुणस्तरको ग्याल्भानाइज्ड अमेरिकी स्टिल र बलिया स्टिलका डेक प्रयोग गरिएको हुँदा ठूला भारवहन क्षमतासहित चौडा फराकिलो बनाउन सकिने छ।’

पुल निर्माणका लागि आवश्यक सामग्री गजुरीबाट काठमाडौँ हुँदै नुवाकोट ल्याउनुपर्ने बाध्यता भएकाले ढुवानीमा समस्या देखिएको छ।

कार्यस्थलमा निर्माण सामग्री आउन र नियमित काम गर्न कुनै अवरोध नभए पाँच दिनभित्र काम सम्पन्न गर्ने लक्ष्य छ। त्यसका लागि नेपाली सेनाको श्री १४ नम्बर वाहिनी अड्डाअन्तर्गत रहेको ब्रिजिङ युनिटबाट सेनानीको नेतृत्वमा ५५ जना प्राविधिक खटिएका छन्।