पूर्वी चीनमा शक्तिशाली डल्फिन आँधीको त्रास, १० लाखभन्दा बढी मानिस विस्थापित

काठमाडौं । चीनको पूर्वी क्षेत्रमा आँधी डल्फिन प्रवेश गरेपछि १० लाखभन्दा बढी मानिसलाई उनीहरूका घरबाट सुरक्षित स्थानमा सारिएको छ।

आँधीका कारण राजधानी साङ्घाईसहित विभिन्न क्षेत्रमा जनजीवन नराम्ररी प्रभावित भएको छ । मौसम विभागका अनुसार, ‘डल्फिन’ आँधीले हिजो साँझ करिब साढे बजे झेजियाङ प्रान्तको युहुआनमा पहिलोपटक जमिनमा प्रवेश गरेको थियो।

त्यसबेला आँधीको अधिकतम गति १५० किलोमिटर प्रतिघण्टासम्म पुगेको थियो। त्यसको करिब एक घण्टापछि आँधीले वेन्झोउ सहरमा दोस्रोपटक जमिनमा प्रवेश गरेको थियो।

आँधीका कारण साङ्घाईमा मात्रै करिब १,४०० उडान रद्द गर्नुपरेको थियो । यसबाट ठूलो संख्यामा यात्रुहरू समस्यामा परेका छन्।

चिनियाँ अधिकारीहरूले ‘डल्फिन’ आँधीलाई लिएर यसअघि सबैभन्दा उच्च तहको ‘रेड अलर्ट’ चेतावनी जारी गरेका थिए। तर, आज बिहान आँधीको तीव्रता कम भएपछि चेतावनीको स्तर घटाइएको छ। मौसम विभागका अनुसार, आँधी अहिले चीनको भित्री भूभागतर्फ अघि बढिरहेको छ।

अधिकारीहरूले बुधबारसम्म मुसलधारे वर्षा, बाढी र पहिरोको सम्भावनालाई लिएर चेतावनी जारी गरेका छन् । शानडोङ, हेनान, हुबेई, आन्हुई, जिआङ्सु र झेजियाङ प्रान्तका साथै साङ्घाईमा सोमबार पनि भारी वर्षा हुने अनुमान गरिएको छ।

स्थानीय प्रशासनले मानिसहरूलाई अत्यावश्यक कामबाहेक घरबाट बाहिर ननिस्कन आग्रह गरेको छ।