युइएफएको चेतावनी: निजी लगानीको योजनाविरुद्ध विश्वकप बहिष्कार गर्न सक्ने

काठमाडौं, १५ साउन। युरोपेली फुटबलको सर्वोच्च निकाय युइएफए (UEFA) मा आबद्ध ५५ सदस्य राष्ट्रहरूले फिफा (FIFA) ले विश्वकपलगायत आफ्ना प्रमुख प्रतियोगितामा निजी लगानीकर्तालाई हिस्सेदारी दिने योजना अघि बढाए विश्वकप बहिष्कार गर्न सक्ने चेतावनी दिएका छन्।

युइएफएको आकस्मिक बैठकले फिफाको उक्त व्यावसायिक प्रस्तावको कडा विरोध गर्ने निर्णय गरेको हो। बिहीबार जारी विज्ञप्तिमा युइएफएले विश्वकपलाई व्यापारिक लगानीको साधन बनाउन नहुने स्पष्ट पारेको छ।

विज्ञप्तिमा भनिएको छ, “विश्वकप फुटबलको ऐतिहासिक विरासत हो, जुन खेलाडी, राष्ट्रिय टोली र समर्थकहरूको दशकौँको भावनाले बनेको छ। यसको कुनै पनि हिस्सा निजी लगानीकर्तालाई सुम्पिन सकिँदैन। विश्वकप बिक्रीका लागि होइन।”

फिफाका अध्यक्ष जियानी इन्फान्टिनोले ‘फिफा फरवार्ड इन्टरप्राइज’ नामक छुट्टै व्यावसायिक कम्पनीमार्फत विश्वकपजस्ता प्रमुख प्रतियोगिता सञ्चालन गर्दै निजी क्षेत्रको लगानी भित्र्याउने योजना अघि सारेका छन्। उक्त योजना अनुमोदन गराउन सदस्य राष्ट्रहरूलाई ४ करोड अमेरिकी डलर दिने प्रस्ताव गरिएको बताइएको छ।

फिफाले सेप्टेम्बर १९ सम्म सदस्य राष्ट्रहरूलाई योजना स्वीकृत गर्न समय दिएको छ। अमेरिकी कम्पनी ‘थ्राइभ इटर्नल’ ले यस योजनामा लगानी गर्न इच्छा देखाएको जानकारी पनि सार्वजनिक भएको छ।

युइएफएले भने फिफामाथि फुटबलको व्यावसायीकरण गर्दै सीमित समूहको हितमा काम गर्न खोजेको आरोप लगाएको छ। साथै, फुटबलका सरोकारवालासँग पर्याप्त परामर्श नगरी गोप्य रूपमा यस्तो योजना ल्याइनु गैरजिम्मेवार कदम भएको उसको भनाइ छ।

इङ्गल्याण्ड र स्कटल्याण्डका फुटबल संघहरूले पनि युइएफएको अडानलाई समर्थन गर्दै विश्वकप सम्पूर्ण फुटबल समुदायको साझा सम्पत्ति भएकाले त्यसलाई निजी स्वामित्वमा दिन नहुने बताएका छन्।

यस विवादलाई ‘युरोपियन सुपर लिग’ पछिको विश्व फुटबलकै सबैभन्दा ठूलो संकटका रूपमा हेरिएको छ। विश्व फुटबलमा युरोपेली टोलीहरूको प्रभाव अत्यधिक रहेको छ। विश्वकपका क्वार्टरफाइनलमा प्रायः ५ देखि ६ टोली युरोपका हुने गरेका छन् भने हालसम्म सम्पन्न २३ संस्करणमध्ये १३ पटक युरोपेली राष्ट्रले उपाधि जितेका छन्।

यदि युरोपेली राष्ट्रहरूले विश्वकप बहिष्कार गरेमा प्रतियोगिताको लोकप्रियता, प्रतिस्पर्धात्मक स्तर र आर्थिक आम्दानीमा ठूलो असर पर्ने विश्लेषण गरिएको छ। यसको प्रभाव आगामी अन्तर्राष्ट्रिय प्रतियोगिता तथा महिला विश्वकप छनोट खेलहरूबाटै देखिन सक्ने अनुमान गरिएको छ।