विश्वकप फाइनलपछि अर्जेन्टिनाविरुद्ध फिफाको अनुशासन प्रक्रिया सुरु

काठमाडौं, १४ साउन । फिफा विश्वकप २०२६ को फाइनलमा स्पेनसँग पराजित भएपछि अर्जेन्टिना टोलीविरुद्ध फिफाले अनुशासनसम्बन्धी कारबाही प्रक्रिया सुरु गरेको छ।

प्रतियोगिताको फाइनल खेलपछि देखिएको विवादास्पद घटनाक्रम र प्रतियोगिताभरको व्यवहारको मूल्याङ्कन गर्न फिफाले अनुसन्धान अधिकृत नियुक्त गरेको थियो। अनुसन्धान अधिकृतको सिफारिसका आधारमा फिफाले अर्जेन्टिनाका केही खेलाडी र अफिसियलमाथि छानबिन अघि बढाएको हो।

न्युयोर्क–न्यु जर्सी रङ्गशालामा भएको फाइनल खेलमा स्पेनसँग १–० ले पराजित भएपछि अर्जेन्टिनाका केही खेलाडी तथा अफिसियलहरू स्पेनी खेलाडीहरूसँग विवादमा उत्रिएका थिए।

फिफाले अर्जेन्टिनाका नहुएल मोलिनामाथि दुईवटा, लिआन्द्रो पारेडेसमाथि तीनवटा र सहायक प्रशिक्षक रोबर्टो आयलामाथि एउटा आरोपमा अनुसन्धान गर्ने जनाएको छ। उनीहरूमाथि फिफाको अनुशासन संहिताको धारा १४ अन्तर्गत ‘कुटपिट वा हातपात’ सम्बन्धी आरोप लगाइएको छ।

यस्तै, मोलिनामाथि खेल भावना विपरीतको व्यवहार गरेको अर्को आरोप पनि लगाइएको छ। अर्जेन्टिनाका थियागो अल्माडा र स्पेनका मिडफिल्डर गाभीमाथि पनि सोही नियम उल्लंघन गरेको आरोप लागेको छ।

फिफाको अनुशासन नियमअनुसार अशिष्ट व्यवहार गर्ने खेलाडी वा पदाधिकारीलाई कम्तीमा एक खेलको प्रतिबन्ध लाग्न सक्ने व्यवस्था छ भने कुटपिट वा हातपातसम्बन्धी गम्भीर घटनामा थप कडा कारबाही हुन सक्नेछ।