विश्वकप २०२६ : पहिलो चरणपछि बीबीसी स्पोर्टको ४८ टोलीको प्रारम्भिक वरियता सार्वजनिक

काठमााडौं , ४ असार ।  फिफा विश्वकप २०२६ मा पहिलो चरणका २४ खेल सम्पन्न भएसँगै सहभागी ४८ टोलीले आफ्नो पहिलो खेल खेलिसकेका छन्। बिहीबार बिहान कोलम्बियाले उज्वेकिस्तानलाई ३–१ ले पराजित गरेपछि समूह चरणको प्रारम्भिक चरण पूरा भएको हो।

पहिलो खेलको प्रदर्शनका आधारमा बीबीसी स्पोर्ट का विज्ञहरूले सबै ४८ टोलीको प्रारम्भिक वरियता (र्याङ्किङ) सार्वजनिक गरेका छन्। विज्ञ समूहले खेल प्रदर्शन, नतिजा र समग्र प्रभावका आधारमा टोलीहरूको मूल्यांकन गरेको बताइएको छ।

शीर्ष १० : प्रमुख दाबेदार टोली

वरियताको शीर्ष स्थानमा फ्रान्स रहेको छ, जसले सेनेगललाई ३–१ ले पराजित गर्दै बलियो सुरुवात गरेको छ। त्यसपछि इङ्ल्यान्ड, अर्जेन्टिना, जर्मनी, अमेरिका, नर्वे, कोलम्बिया, मोरक्को, ब्राजिल र स्वीडेन क्रमशः शीर्ष १० मा परेका छन्।

विश्लेषणअनुसार फ्रान्स सबैभन्दा सन्तुलित र बलियो टोली देखिएको छ भने अर्जेन्टिना लियोनल मेसीको प्रभावमा उच्च मनोबलसहित अघि बढिरहेको छ। इङ्ल्यान्ड र जर्मनीले आक्रामक प्रदर्शन गरे पनि रक्षापंक्तिमा केही कमजोरी देखिएको उल्लेख गरिएको छ।

मध्यम स्तरका टोली (११–३०)

यस समूहमा अस्ट्रेलिया, स्पेन, नेदरल्यान्ड्स, मेक्सिको र जापानजस्ता टोलीहरू रहेका छन्। स्पेन गोलरहित बराबरीमा रोकिँदा अपेक्षाअनुसार प्रदर्शन गर्न सकेन भने जापान र नेदरल्यान्ड्सले रोमाञ्चक बराबरी खेलेका थिए।

बेल्जियम, इजिप्ट, सेनेगल, पोर्चुगल, क्रोएसिया, स्विट्जरल्यान्ड र उरुग्वेजस्ता टोलीहरू पनि मिश्रित प्रदर्शनसहित मध्य वरियतामा रहेका छन्।

कमजोर प्रदर्शन गर्ने टोली (३१–४८)

तल्लो वरियतामा टर्की, अस्ट्रिया, घाना, अल्जेरिया, क्यानडा, कतार, पाराग्वे, ट्युनिसिया र कुरासाओजस्ता टोलीहरू परेका छन्।

कतार र क्यानडाले पहिलो खेलमा जित निकाल्न नसक्दा आलोचना खेपिरहेका छन् भने केही टोलीहरू भारी पराजयका कारण पुछारतर्फ पुगेका छन्।

वरियताले पहिलो खेलको प्रदर्शन मात्र आधार मानेको भए पनि समूह चरणका बाँकी खेलपछि चित्र पूर्ण रूपमा परिवर्तन हुने अपेक्षा गरिएको छ।