मेसीको ह्याट्रिकसँगै विश्वकपमा ऐतिहासिक कीर्तिमान, दर्शकले उभिएर सम्मान
काठमाडौं, असार ३ — अमेरिकाको क्यानसस सिटी रंगशालामा बुधबार बिहान भएको खेलमा अर्जेन्टिनाका कप्तान लिओनल मेसी ले अल्जेरियाविरुद्ध ह्याट्रिक गर्दै विश्वकप फुटबलमा नयाँ इतिहास रचेका छन्।
खेलको ८०औं मिनेटमा करिब ७० हजार दर्शक मेसीप्रति सम्मान जनाउँदै उभिएका थिए। खेलमा मेसीले तीन गोल गर्दै विश्वकपमा सर्वाधिक गोलकर्ताको कीर्तिमान बराबरी गरेका छन्।
मेसीले खेलको १८औं मिनेटमा करिब २५ यार्ड टाढाबाट उत्कृष्ट कर्लिङ प्रहारमार्फत पहिलो गोल गरेका थिए। ६०औं मिनेटमा विपक्षी गोलरक्षकको गल्तीको फाइदा उठाउँदै उनले दोस्रो गोल गरे भने ७६औं मिनेटमा निको गोन्जालेजको पासमा ह्याट्रिक पूरा गरे।
यससँगै मेसी विश्वकप इतिहासमा पाँच फरक संस्करणमा गोल गर्ने दुर्लभ उपलब्धि हासिल गर्ने खेलाडी बनेका छन्। उनले २००६, २०१४, २०१८, २०२२ र २०२६ का विश्वकपमा गोल गरेका छन्।
मेसीले विश्वकपमा आफ्नो गोल संख्या १६ पुर्याउँदै जर्मनीका पूर्व खेलाडी मिरोस्लाभ क्लोजको कीर्तिमान बराबरी गरेका छन्। उनी विश्वकपमा सर्वाधिक गोल गर्ने खेलाडी बन्न एक गोलले मात्र पछाडि छन्।
त्यस्तै, उनी विश्वकपका ६ फरक संस्करण खेल्ने पहिलो खेलाडी बनेका छन्। २००६ मा सुरु भएको विश्वकप यात्रा २०२६ सम्म निरन्तर रहँदा उनले २७ खेल खेलिसकेका छन्।
३८ वर्षको उमेरमा ह्याट्रिक गर्दै मेसीले उमेरसम्बन्धी नयाँ कीर्तिमान समेत बनाएका छन्। विश्वकपमा उनले २० वर्षको अन्तरालमा गोल गर्दै असाधारण दीर्घ करियर प्रदर्शन गरेका छन्।
खेलपछि अर्जेन्टिनाका प्रशिक्षक लिओनेल स्कालोनी ले मेसीलाई शब्दमा वर्णन गर्न नसकिने खेलाडी भन्दै उनको प्रशंसा गरेका थिए। मेसीले आफू अझै मैदानमा रमाइरहेको र यो अनुभवलाई “बोनस” को रूपमा लिएको प्रतिक्रिया दिएका छन्।
प्रतिक्रिया दिनुहोस्