अध्ययन बिदा लिएर सेवामा नफर्किने प्राध्यापक–कर्मचारीलाई त्रिविको १५ दिने अल्टिमेटम

काठमाडौं ३ असार । त्रिभुवन विश्वविद्यालय ले अध्ययन बिदा लिएर अध्ययन पूरा गरेपछि पनि विश्वविद्यालयको सेवामा नफर्किएका प्राध्यापक तथा कर्मचारीहरूलाई १५ दिनभित्र सम्पर्कमा आउन निर्देशन दिएको छ।

विश्वविद्यालयको अध्ययन बिदा सुव्यवस्थापन कार्यान्वयन समिति ले बुधबार सार्वजनिक सूचना जारी गर्दै अध्ययन बिदा उपभोग गरेपछि नियमानुसार सेवामा नफर्केका वा तोकिएको सेवा अवधि पूरा नगरी सेवा छाडेका शिक्षक तथा कर्मचारीलाई समितिको कार्यालयमा सम्पर्क राख्न आग्रह गरेको हो।

त्रिविले तोकिएको समयसीमाभित्र सम्पर्कमा नआए अध्ययन बिदाका क्रममा गरिएको कबुलियतनामा तथा प्रचलित नियमअनुसार कानुनी कारबाही प्रक्रिया अघि बढाइने चेतावनी दिएको छ।

विश्वविद्यालयका अनुसार अध्ययन बिदा लिएर सेवामा नफर्किएका ५० जना प्राध्यापकबाट हालसम्म ११ करोड ८४ लाख रुपैयाँभन्दा बढी रकम फिर्ता भइसकेको छ। यो असुली प्रक्रिया शिक्षा, विज्ञान तथा प्रविधि मन्त्रालय को पहल र त्रिविको सक्रियतामा अघि बढाइएको जनाएको छ।

त्रिविले अध्ययन बिदा दक्ष, अनुसन्धानमुखी तथा अन्तर्राष्ट्रिय स्तरको प्राज्ञिक जनशक्ति उत्पादन गर्ने उद्देश्यले प्रदान गरिने विशेष सुविधा भएको उल्लेख गरेको छ। तर केही प्राध्यापकहरूले अध्ययन बिदाको दुरुपयोग गर्दै अध्ययन सम्पन्न गरेपछि सेवामा नफर्किँदा विश्वविद्यालयलाई आर्थिक, शैक्षिक तथा प्राज्ञिक क्षति पुगेको विश्वविद्यालयको भनाइ छ।

विश्वविद्यालयले अध्ययन बिदा सुविधा उपयोग गर्ने शिक्षक तथा कर्मचारीले सम्झौताअनुसारको सेवा दायित्व पूरा गर्नुपर्ने व्यवस्था रहेको स्मरण गराउँदै बाँकी रकम असुली तथा कानुनी प्रक्रिया निरन्तर अघि बढाइने जनाएको छ।