एमाले सबै प्रदेश र जिल्ला कमिटीको संयुक्त बैठक गर्दै

काठमाडौं, ८ पुस । नेकपा एमालेले ११औँ महाधिवेशनको सन्देश देशैभरि प्रवाह गर्नका लागि आजै सबै प्रदेश र ७७ वटै जिल्ला कमिटीको संयुक्त बैठक आयोजना गरेको छ ।

पार्टीका महासचिव शङ्कर पोखरेलले भर्चुअल माध्यमद्वारा पार्टीको ठूलो समूहलाई एकैपटक महाधिवेशनको सन्देश प्रवाह गर्न लागेका हुन् । दिउँसो २ बजे पार्टी कार्यालयबाट महासचिवले सम्बोधन गर्ने तय गरिएको छ ।

केन्द्रीय कार्यालय सचिव डा. भीष्म अधिकारीले जिल्ला कमिटीमा पदाधिकारीदेखि सचिवालय सदस्य सम्म र प्रदेश कमिटीका पदाधिकारीलगायत सबै सदस्यलाई उक्त बैठकमा सहभागी हुन जुम आइडी पठाइसकिएको जानकारी दिए ।

पार्टीको ११औँ महाधिवेशनको प्रारम्भिक फैसला जनसमक्ष पुर्याउन आजको बैठक आयोजना गरिएको हो’ अधिकारीले भने ‘महाधिवेशनले चुनेको नेतृत्व, यसको कार्यभार,वर्तमान राजनीतिक अवस्था आदिका बारेमा महासचिव कमरेडले प्रस्ट पार्नुहुनेछ ।’

एमालेले स्थानीय तहबाट भइरहेका गतिविधि,पार्टीसँगको समन्वय र महाधिवेशनले दिएको राजनीतिक कार्यदिशालाई स्विकारेर काम गर्न पार्टीपंक्तीमा निर्देशन पठाउने भएको छ । कोशी प्रदेश कमिटीका अध्यक्ष घनश्याम खतिवडाका अनुसार बैठकका बारेमा सबै जिल्ला कमिटीलाई जानकारी गराइसकिएको छ । यसले गर्दा सबै तयारीसहित आकने बैठक सम्पन्न हुनेछ ।