९ अर्बभन्दा बढीको कारोबार, ३०.७५ अंकले वृद्धि, बजारले सकारात्मक बाटो समात्दा नेप्सेमा हरियाली

काठमाडौं, १६ कार्तिक । नेपाल स्टक एक्सचेञ्ज (नेप्से) बढेको छ । साताको अन्तिम दिन बिहीबार बजार परिसूचक ३०।७५ अङ्कले बढेको हो ।

योसँगै परिसूचक २६३१।१४ विन्दुमा पुगेको छ । बजारमा आज ९ अर्ब १० करोडको कारोबार भएको छ । यो कारोबार रकम अघिल्लो दिनभन्दा झण्डै डेढ अर्बले बढी हो । गत विहीबार ७ अर्ब ५१ करोडको कारोबार भएको थियो ।

बजारमा आज १९८ कम्पनीको मूल्य बढेको छ । ५० कम्पनीको मूल्य घट्दा २ कम्पनीको मूल्य स्थिर रहेको छ ।

ट्रेडिङ सेक्टर बाहेक बजारका सबै समूहको सूचक बढेको छ । फाइनान्स क्षेत्रमा ५।१७ प्रतिशत र जीवन बीमा क्षेत्रमा ४।३५ प्रतिशत माथिको वृद्धि भएको छ ।

आज बजारमा ५ कम्पनीको मूल्य १० प्रतिशतसहित सकारात्मक सर्किट लागेको छ भने अन्य दुई कम्पनीको सेयर समेत सर्किट लेभलमै बढेका छन् । यसरी सर्किट लाग्ने कम्पनीहरुमा सामुदायिक लघुवित्त, गोर्खाज फाइनान्स, सञ्चकन्या माई हाइड्रोपावर, पिपुल्स पावर, तेह्रथुम पावर, गुह्वेश्वरी मर्चेन्ट बैंकिङ र उन्नति सहकार्य लघुवित्त रहेका छन् । सबैभन्दा धेरै गिरावट खानीखोला हाइड्रोपावरको ४।७६ प्रतिशत भएको छ ।

कारोबारका आधारमा आज पनि हिमालयन बैंकको प्रोमोटर सेयरको १ अर्ब ६६ करोडको कारोबार भएको छ । युनियन हाइड्रोपावरको ३४ करोड र वुटवल पावर कम्पनीको २५ करोडको कारोबार भएको छ ।