आज हरिबोधिनी एकादशी विष्णुको प्रतीकका रूपमा तुलसीको पूजा गरिईदै

काठमाडौं, १५ कार्तिक । आज हरिबोधिनी एकादशीको दिन हरेक घर घरमा तुलसीको पूजा आजा गरि होम गर्ने गरिन्छ । हरेक वर्ष कार्तिक शुक्ल एकादशीका दिनमा भगवान् विष्णुको प्रतीकका रूपमा तुलसीको दामोदरसँग विवाह र विशेष पूजा गरी मनाइने हरिबोधिनी एकादशी मनाइने प्रचलन रहेको छ ।

आषाढ शुक्ल एकादशी अर्थात् हरिशयनी एकादशीका दिनमा क्षीरसागरमा सुतेका विष्णु ब्युँझिने भएकाले आजको एकादशीलाई हरिबोधिनी वा प्रबोधिनी एकादशी पनि भनिन्छ ।

हरिशयनी एकादशीका दिन घर–घरमा रोपेर विशेष पूजा गरिएको तुलसीको मठमा गाईको गोबर र रातो माटोले पोतेर सिँगारी फूल मालाले सजाएर आज विवाह गरिन्छ । तुलसी विष्णुप्रिया भएकाले यस दिन तुलसीको दामोदरसँग विवाह गर्ने परम्परा बसेको हो । तुलसीको मठ नजिकै विष्णुको प्रतीकका रूपमा निगालाको लिङ्ग गाडेर विधिपूर्वक पूजा गरिन्छ ।

आजका दिन विशेष गरी काठमाडौँ उपत्यकाको चाँगुनारायण, ईचाँगुनारायण, शेषनारायण, विसंखुनारायण र बुढानीलकण्ठमा विशेष मेला लाग्ने गर्दछ ।

भक्तहरुले झरीकोसमेत प्रवाह नगरी मन्दिरहरुमा गई विुष्णु भगवानको पूजा आजा गरेका छन् । यस्तै चाँगुनारायण,बुढानीलकण्ठ, ईचाँगुनारायण, शेषनारायण, विसंखुनारायण मन्दिरमा झरीको समयमा पनि दर्शनका लागि श्रद्धालुहरूको भीड लागेको छ ।