अवरुद्ध मुग्लिन–नारायणगढ सडकखण्ड सञ्चालनमा

काठमाडौं, १ असोज । अविरल पहिरोको कारण गएरातिदेखि अवरुद्ध भएको मुग्लिन–नारायणगढ सडकखण्ड सञ्चालनमा आएको छ । तुइन खोलानजिकै पहिरो जाँदा अवरुद्ध भएको सडक बिहान ८ः३० बजेबाट सञ्चालनमा आएको इलाका प्रहरी कार्यालय मुग्लिनले जनाएको छ ।

सडकमा खसेको पहिरो हटाएसँगै सडक दुईतर्फी सञ्चालनमा आएको हो । गएराति ९ बजे पहिरो जाँदा सवारी आवागमन दुवैतर्फ अवरुद्ध भएको थियो ।

पहिरो गएको स्थानमा ढुंगा खस्ने क्रम नरोकिएकोले यात्रामा सावधानी अपनाउन नेपाल प्रहरीले आग्रह गरेको छ ।