ग्रामीण विकास लघुवित्तले डाक्यो वार्षिक साधारणसभा, समाजसँगको मर्जर मुख्य प्रस्ताव

काठमाडौं,८ असार । ग्रामीण विकास लघुवित्त वित्तीय संस्थाले आफ्नो दसौँ वार्षिक साधारणसभा डाकेको छ ।

संस्थाको सञ्चालक समितिको बैठकले यही असार २८ गते वार्षिक साधारणसभा आयोजना गर्ने निर्णय गरेको हो । सभा रुपन्देहीको बुटवलस्थित संस्थाको प्रधान कार्यालयमा बिहान ११ बजेबाट सुरु हुनेछ । सभा भर्चुअल माध्यमबाट पनि हुनेछ ।

सभाले ग्रामीण विकास र समाज लघुवित्तबीचको मर्जरसम्बन्धी विशेष प्रस्ताव पारित गर्नेछ । हाल संस्थाको जारी र चुक्तापुँजी ९८ करोड २५ लाख रुपैयाँ र समाज लघुवित्तको २ करोड २८ लाख ५० हजार रुपैयाँ रहेकोले मर्जरपछि पुँजी संरचना परिवर्तन हुने भएकोले सोहीबमोजिम नियमावली तथा प्रबन्धपत्रमा संशोधन गर्ने विशेष प्रस्ताव सभाले अनुमोदन गर्नेछ ।

सभाले दुवै संस्थाको शेयर स्वाप रेसियो १ः१ अनुपात कायम गरी मर्जर गर्न स्वीकृति प्रदान गर्ने प्रस्ताव पारित गर्नेछ । सभाले दुई संस्थाबीचको मर्जरका लागि हालसम्म भएका सबै प्रक्रिया तथा गतिविधि स्वीकृत गर्नेछ ।

सभाले मर्जरपश्चात नेपाल राष्ट्र बैंकबाट अन्तिम स्वीकृतमा उल्लेख भई आएबमोजिमको नामबाट एकीकृत कारोबार गर्ने प्रस्ताव पनि सभाले पारित गर्नेछ । प्रबन्धपत्र र नियमावलीमा नियमनकारी निकायहरुबाट कुनै फेरबदल वा थपघट लगायत समितिलाई अख्तियारी प्रदान गर्ने विशेष प्रस्ताव पारित हुनेछ ।

सभाले गत आर्थिक वर्ष २०८०/८१ को वार्षिक तथा लेखापरीक्षकको प्रतिवेदन स्वीकृत गर्नेछ भने चालु आर्थिक वर्ष २०८१/८२ का लागि लेखापरीक्षकको नियुक्ति र निजको पारिश्रमिक निर्धारणसम्बन्धी प्रस्ताव अनुमोदन गर्नेछ ।

वार्षिक साधारणसभा प्रयोजनार्थ संस्थाले असार १५ गते बुक क्लोज गर्ने निर्णय गरेको छ। यसको अर्थ असार १५ गतेभन्दा अघिसम्म कायम शेयरधनीहरुमात्रै यो संस्थाको वार्षिक साधारणसभामा भाग लिन योग्य हुनेछन्।