गणतन्त्रको बोर्ड झुण्डाएर पार्टीहरूले पञ्चायतीकरण र नेताहरूको राजतन्त्र कायम रहेसम्म गणतन्त्र टिकाउ हुँदैन: महासचिव भुसाल

काठमाडौं, १७ जेष्ठ । नेकपा (एकीकृत समाजवादी) का महासचिव घनश्याम भुसालले पार्टीहरूको पञ्चायतीकरण र नेताहरूको राजतन्त्र कायम रहेको बताएका छन् । शनिबार ललितपुरमा आयोजित एक कार्यक्रमलाई सम्बोधन गर्दै भुसालले गणतन्त्रको स्टिकर टाँसेर मात्रै गणतन्त्र रहन नसक्ने बताएका हुन् ।

उनले देश र जनता बनाउनुको ठाउँमा नेताहरू धन कमाउने कुरामा ध्यान केन्द्रित गरिरहेको बताए । लोकतन्त्रमा दल नसुध्रीकन नहुने उनको भनाइ छ ।

महासचिव भुसालले भने, ‘भारदारहरू र हाम्रा नेताहरू फरक छन् साँच्चै ? भन्न सक्छौँ ? म गणतन्त्रवादी, मेरा नेता र राजाका भारदारको जीवनमा फरक छैन । तिनले बस्ने कुर्सी, तिनले हिँड्ने तरिका, तिनका भेटघाट, रातिको भेटघाट, सम्पत्ति । साँच्चै कति कति फरक छ । गणतन्त्रवादीले यो नैतिकताका साथ किन भन्न सकिरहेका छैनन् । दोषी को हो ? यो नखोज्ने हो भने बिरालाको घाँटीमा कसैले घण्टी बाँध्दैनन् । दूरदिन अझै लम्बिएर जान्छ ।’

महासचिव भुसालले भारदारहरू र गणतन्त्रवादीहरू फरक छौँ भनेर नैतिकताका साथ गणतन्त्रवादीहरूले भन्न नसक्ने बताए । उनले भने, ‘यो त्यही विचारमा हामीले गरेको कम्प्रमाइजका लागि बीपीले र पुष्पलालले लिएको बदला हो भन्ने लाग्छ । पार्टीहरू पञ्चायत जस्ता भए । अलिअलि छलफल त पञ्चायत, राष्ट्रिय पञ्चायतमा पनि हुन्थे । पार्टीहरूको पञ्चायतीकरण, नेताहरूको राजतन्त्र । गणतन्त्रको एउटा स्टिकर टाँसेर हुने हो की ? हामी धन कमाउने आदि इत्यादि काममा हामी गयौँ । लोकतन्त्रमा दल नसुध्रीकन हुँदैन ।’