धवल शम्शेरमाथि हिंसा भड्काएको र राज्यविरूद्ध कसुर गरेको भन्दै अनुसन्धान

काठमाडौं,१७ चैत । राष्ट्रिय प्रजातन्त्र पार्टी (राप्रपा) का महामन्त्री धवल शम्शेर राणा पक्राउ परेको सूचना संघीय संसद सचिवालयमा पुगेको छ ।

आजको प्रतिनिधि सभा बैठकमा उनी पक्राउ परेकोबारे सूचना सभामुख देवराज घिमिरेले पढेर सुनाउनेछन्। राप्रपा महामन्त्री राणा प्रतिनिधि सभा सांसद छन्।

राणाविरूद्ध तीनकुनेमा चैत १५ गते हिंसा भड्काएको र राज्यविरूद्ध कसुरमा अनुसन्धान भएको जानकारी संघीय संसद सचिवालयमा पुगेको हो ।

दुर्गा प्रसाईंको आह्वानमा राजसंस्था पुनस्र्थापनाका लागि चैत १५ गते तीनकुने क्षेत्रमा प्रदर्शन भएको थियो । प्रसाईंले चलाएको गाडीले प्रहरीलाई पेलेर सुरक्षा घेरा तोडेर निषेधित क्षेत्र प्रवेश गरेको थियो ।

प्रसाईंले सुरक्षा घेरा तोडेपछि प्रदर्शनकारीहरू पनि उनीसँगै अघि बढेपछि प्रहरीले अश्रुग्यास प्रहार गरेको थियो । त्यसपछि प्रदर्शनकारीहरूले व्यक्तिगत घर तोडफोड र आगजनी गरेका थिए ।

यो समितिमा राप्रपा वरिष्ठ उपाध्यक्ष रवीन्द्र मिश्र र महामन्त्री राणा पनि सदस्य छन्। उनीहरू पनि तीनकुने प्रदर्शनमा पुगेका थिए । मिश्र र राणाले प्रदर्शनकारीहरूलाई भड्काउने भूमिका खेलेको आरोप लगाइएको छ ।

गत शुक्रबार साँझ मिश्र र राणालाई प्रहरीले पक्राउ गरेको थियो । प्रसाईं भने फरार छन्। प्रहरीले आइतबार मिश्र र राणालाई म्याद थप गर्नका लागि अदालत उपस्थित गराउने तयारी गरेको छ ।