यी ५ कम्पनीको शेयरमा बोलपत्र पेस गर्ने आज अन्तिम दिन

काठमाडौं,१० चैत । एनआईसी एसिया बैंकले लिलामी प्रक्रियामार्फत बिक्रीमा राखेको ५ वटा कम्पनीको करिब साढे १४ लाख बढी कित्ता शेयर खरिदका लागि बोलपत्र पेस गर्ने आज अन्तिम दिन रहेको छ ।

बैंकको स्वामित्वमा रहेको ५ कम्पनीको १४ लाख ४६ हजार ८८४ कित्ता शेयर बिक्रीमा राखेको छ । जसमा नेपाल इन्फ्रास्ट्रक्चर बैंकको १० लाख कित्ता, जीवन विकास लघुवित्तको २ लाख ८७ हजार ८४२ कित्ता, सूर्योदय वोमी लघुवित्तको ५९ हजार ६० कित्ता, सूर्यज्योति लाइफ इन्स्योरेन्सको ५० हजार कित्ता र नागरिक लगानी कोषको ५० हजार कित्ता रहेको छ । यी कम्पनीको शेयर खरिदका लागि आज बैंकिङ समयसम्म बोलपत्र पेस गर्न सकिनेछ ।

बिक्रीमा राखिएको शेयरको न्यूनतम मूल्य प्रतिकित्ता निफ्राको १०५ रुपैयाँ, जीवन विकास लघुवित्तको ५४० रुपैयाँ, सूर्योदय वोमी लघुवित्तको २६९ रुपैयाँ, सूर्यज्योति लाइफको १५९ रुपैयाँ र नागरिक लगानी कोषको ६९६ रुपैयाा तोकिएको छ । लगानीकर्ताले शेयर खरिदका लागि बोलपत्र पेस गर्दा न्यूनतम मूल्य वा सोभन्दा बढी बोलकबोल गर्नुपर्नेछ ।

यी कम्पनीको लिलामी शेयरमा योग्य लगानीकर्ताले खरिदका लागि बोलपत्र पेस गर्न सक्नेछन्। बोलपत्र पेस गर्दा आफूले लिन चाहेको शेयर संख्या खुलाउनुपर्नेछ भने अधिकतममा सम्पूर्ण शेयर खरिदका लागि आवेदन दिन सकिनेछ ।

बोलपत्र काठमाडौंको थापाथलीस्थित एनआईसी एसिया क्यापिटलको कार्यालय वा थापाथलीस्थित एनआईसी एसिया बैंकको कर्पोरेट कार्यालय तथा शाखाहरु काठमाडौं, विराटनगर, वीरगन्ज, पोखरा, बुटवल, धनगढी र वीरेन्द्रनगरमा पेस गर्न सकिनेछ ।