सानिमा रिलायन्स लाइफ इन्स्योरेन्स लिमिटेडको खुद नाफा बढ्यो

काठमाडौं,२८ माघ । सानिमा रिलायन्स लाइफ इन्स्योरेन्स लिमिटेडले चालु आ.व.को दोस्रो त्रैमाससम्मको अपरिष्कृत वित्तीय विवरण प्रकाशित गरेको छ । प्रकाशित विवरण अनुसार चालु आर्थिक वर्षको दोस्रो त्रैमाससम्ममा इन्सुरेन्सको खुद नाफा बढेको छ ।

समिक्षा अवधिमा खुद नाफा ५.४४ प्रतिशतले बढेर २३ करोड १६ लाख ८९ हजार रुपैयाँ पुगेको छ । अघिल्लो वर्षको यसैअवधिमा यसले २१ करोड ९७ लाख ३० हजार रुपैयाँ खुद नाफा कमाएको थियो ।

इन्स्योरेन्सको खुद बिमा शुल्क आर्जन बढेसँगै यसको खुद नाफा पनि बढेको हो । खुद बिमा शुल्क आर्जन १८.७३ प्रतिशतले बढेर ३ अर्ब ११ करोड १४ लाख ७८ हजार रुपैयाँ पुगेको छ । अघिल्लो वर्षको यसैअवधिमा यसले २ अर्ब ६२ करोड रुपैयाँ खुद बिमा शुल्क आर्जन गरेको थियो ।

पुस मसान्तसम्म आइपुग्दा यसको प्रतिसेयर आम्दानी ९ रुपैयाँ ३६ पैसा र प्रतिसेयर नेटवर्थ ११४ रुपैयाँ ३८ पैसा छ । चुक्ता पुँजी ४ अर्ब ९५ करोड ३० लाख ६५ हजार रुपैयाँ रहेको छ ।