भारतमा जारी खो खो विश्वकप अन्तर्गत क्वाटरफाइनलमा प्रतिस्पर्धा गर्दै नेपालका पुरूष र महिला दुवै टोली
काठमाडौं, ४ माघ । भारतमा जारी खो खो विश्वकपअन्तर्गत शुक्रबार नेपालका पुरूष र महिला दुवै टोलीले क्वाटरफाइनलमा प्रतिस्पर्धा गर्दै छन् ।
महिलातर्फको क्वाटरफाइनलमा नेपालले इरानसँग खेल्ने छ भने पुरूषतर्फको क्वाटरफाइनलमा बंगलादेशसँग खेल्ने छ ।
नेपाल र इरानको महिला टोलीबीचको क्वाटरफाइनल खेल अपरान्ह पौने ५ बजे सुरू हुनेछ । विजेताले युगाण्डा र न्युजिल्याण्डबीचको विजेतासँग सेमिफाइनल खेल्ने छन् ।
त्यसैगरी नेपाल र बंगलादेशको पुरूष टोलीबीचको क्वाटरफाइनल खेल साँझ ६ बजे सुरू हुनेछ । विजेताले इरान र केन्याबीचको विजेतासँग फाइनल प्रवेशका लागि खेल्ने छन् ।
नेपालको महिला टोली समूह सी को विजेताका रूपमा क्वाटरफाइनलमा पुगेको थियो । आफ्नो समूहमा अपराजित रहेको नेपालले पहिलो खेलमा भुटानलाई, दोस्रो खेलमा जर्मनीलाई, तेस्रो खेलमा श्रीलंकालाई तथा चौथो खेलमा बंगलादेशलाई हराएको थियो ।
त्यसैगरी पुरूषतर्फ नेपाल समूह ए को उपविजेताका रूपमा क्वाटरफाइनलमा पुगेको थियो । नेपाल समूह चरणको पहिलो खेलमा भारतसँग पराजित हुँदा दोस्रो खेलमा पेरू, तेस्रो खेलमा ब्राजिल र चौथो खेलमा भुटानलाई हराएको थियो ।
प्रतिक्रिया दिनुहोस्