लस एन्जलसको जंगलमा लागेको डढेलो नियन्त्रण बाहिर जाँदा ३० हजार घर परिवारलाई घर छोड्न सरकारको अनुरोध

लस एन्जलसमा आँधीको गतिको हावाले बढाएको डढेलोले दर्जनौँ घर नष्ट गर्दा लस एन्जलसको उपनगरीय क्षेत्रबाट दशौँ हजार मानिस आफ्ना घरबाट भागेका छन् भने ३० हजार भन्दा बढिलाई घर छोड्न सरकारले अनुरोध गरेको छ । अमेरिकी मिडियाका अनुसार उच्च वर्गीय प्यासिफिक पालिसेड्स छिमेकी क्षेत्र नजिकैको आगो निभाउने क्रममा कम्तीमा एक दमकलकर्मी घाइते भएका छन् र केही अन्य मानिस जलेको खबर आएको छ ।

भयानक हावाले आगोलाई फैलाउँदै रातो–तातो झिल्काहरुलाई सयौँ मिटर टाढासम्म उडाउँदै असहाय दमकलकर्मीहरुले निभाउन नसक्ने गरी नयाँ स्थानहरुमा आगो सल्किँदै गएको थियो । बिहान हुँदा लस एन्जलसमाथि धुवाँको विशाल पर्दा देखिन्थ्यो र हावामा जलेको तीखो गन्ध थियो ।

सहरका मेयर करेन बासले एक्समा पोस्ट गर्दै चेतावनी दिनए, “आँधी बिहानभर झन् खराब हुने अपेक्षा गरिएको छ ।” लस एन्जलस टाइम्सका अनुसार पालिसेड्समा केही दमकलकर्मीले हाइड्रेन्टमा पानीको कमी सामना गरिरहेका छन् । त्यहाँको आगोले अहिलेसम्म लगभग तीन हजार एकड भूमि जलाइसकेको छ ।

लस एन्जलसको उत्तरमा अल्टाडेना वरपर दुई हजार दुई सय एकडमा भएको इटोन आगलागीमा एएफपीका एक पत्रकारले आपत्कालीन कामदारहरुले वृद्ध बिरामीहरुलाई उनीहरुको हेरचाह सुविधाबाट ह्विलचेयरमा बाहिर निकाल्दै गरेको देखे ।

तेस्रो आगो सान्ता क्लारिटाको वरिपरि लागिरहेको थियो । प्यासिफिक पालिसेड्सको आगलागीले क्यालिफोर्नियाको सबैभन्दा मनपर्ने स्थानहरु मध्ये एकमा दर्जनौँ घर नष्ट गरिसकेको छ । त्यहाँ हलिउडका सेलिब्रेटीहरु करोडौँ डलरको घरमा बस्नेहरु मध्ये छन् ।

एमी पुरस्कार विजेता अभिनेता जेम्स वुड्सले आफ्नो घर खाली गर्न तयार हुँदै गर्दा आफ्नो घर नजिकैका रुख र झाडीहरुमा आगो लागेको भिडियो पोस्ट गरे र सबै आगोका अलार्म बजिरहेको बताए । “हाम्रो पहाडको प्यारो सानो घर यति लामो टिक्यो भन्ने मलाई विश्वास लाग्दैन । यो कुनै प्रियजनलाई गुमाए जस्तो महसुस भइरहेको छ”, उनले भने ।

मंगलबार बिहान पहिलो डढेलो सुरु भयो र धेरै बासिन्दालाई चकित पार्दै यो द्रुत गतिमा बढेको थियो ।
यस क्षेत्रमा मौसमी सान्ता एना हावाले प्रहार गरिरहेको बेला आगो लागेको थियो । पूर्वानुमानकर्ताहरुले यो प्रतिघन्टा एक सय ६० किलोमिटरसम्मको वेगका साथ एक दशकमा सबैभन्दा खराब आँधीबेहरीमा परिणत हुनसक्ने बताएका थिए ।

जंगलमा लागेको डढेलो अमेरिकाको पश्चिममा जीवनको हिस्सा हो र यसले प्रकृतिमा महत्वपूर्ण भूमिका खेल्छ । तर वैज्ञानिकहरुका अनुसार मानव–निर्मित जलवायु परिवर्तनले मौसम ढाँचाहरुलाई परिवर्तन गरिरहेको छ ।

• एजेन्सीको सहयोगमा