फिल्म ‘‘शाम्बाला’ ९७औं ओस्कार अवार्डबाट बाहिरियो

काठमाडौं, ४ पुस । ९७औं ओस्कार अवार्डबाट फिल्म ‘शाम्बाला’ बाहिरिएको छ । नेपालबाट अन्तर्राष्ट्रिय फिचर विधामा सिफारिस फिल्म उत्कृष्ट १५ फिल्मको सर्टलिस्टमा समेत पर्न सकेन ।

बुधबार अस्कर आयोजक संस्था एकेडेमी अफ पिक्चर आर्ट्स एन्ड साइन्सेसले सार्वजनिक गरेको सर्टलिस्टमा ‘शाम्बाला’ सहभागी छैन । मीनबहादुर भाम निर्देशित फिल्म ‘शाम्बाला’ केही अगाडि नेपालमा प्रदर्शनमा आएको थियो ।

फिल्मले अस्ट्रेलियाको एसिया प्यासिफिक अवार्डमा युनेस्को कल्चरल डाइभर्सिटी अवार्ड, भारतको मुम्बई फिल्म फेस्टिभलमा स्पेसल मेन्सन अवार्ड, टर्कीको बोसफोरस फिल्म फेस्टिभलमा उत्कृष्ट फिल्म, निर्देशक र अभिनेत्रीको अवार्ड जितिसकेको छ ।