मोटरसाइकलको ठक्करबाट भक्तपुरमा पैदलयात्रीको मृत्यु

काठमाडौं,३० मंसिर । भक्तपुरमा मोटरसाइकलले ठक्कर दिंदा एक पैदलयात्रीको मृत्यु भएको छ । रामेछापको दोरम्बा गाउँपालिका-४ घर भई सूर्यविनायक नगरपालिका-१० नलिन्चोक बस्ने ७० वर्षीय निमबहादुर मगरको मृत्यु भएको प्रहरी परिसर भक्तपुरले जनाएको छ ।

जगातीबाट साँगागा जाँदै गरेको बा ४६प ११२७ नम्बरको मोटरसाइकलले नलिन्चोक जोरपाटीमा निमबहादुरलाई ठक्कर दिएको थियो ।

गम्भीर घाइते भएका उनलाई मध्यपुर अस्पताल पुर्‍याइएकोमा उपचारकै क्रममा राति उनको मृत्यु भएको प्रहरीले जनाएको छ ।

मोटरसाइकल चालक ४४ वर्षीय जितेन्द्र श्रेष्ठलाई प्रहरीले नियन्त्रणमा लिएको प्रहरी परिसर भक्तपुरले जनाएको छ ।